എഴുകോൺ: മലയാള സിനിമയിൽ വേറിട്ട വഴികളിലൂടെ സഞ്ചരിച്ച സംവിധായകരായ ഹരിഹരനെയും ഐ.വി. ശശിയേയും ഒരേ പോലെ ചേർത്ത് നിറുത്തിയ തിരക്കഥാകൃത്തായിരുന്നു എം.ടി. വാസുദേവൻ നായർ.
ഇരുവർക്കുമായി എം.ടിയുടെ തൂലികയിൽ പി​റന്നത് 23 തിരക്കഥകളാണ്. 1981 ൽ പുറത്തിറങ്ങിയ തൃഷ്ണ മുതൽ 1990 ൽ പുറത്തിറങ്ങിയ മിഥ്യ വരെ 11 തിരക്കഥകളാണ് ഐ.വി ശശിക്ക് വേണ്ടി എം.ടി. ഒരുക്കിയത്. തൃഷ്ണയാണ് മമ്മൂട്ടിയെ നായക വേഷത്തിലെത്തിച്ചതിൽ നിർണായകമായത്. 1983 ൽ ആരൂഢം എന്ന അക്കാലത്തെ മെഗാഹിറ്റ് ചിത്രം. 1984 ൽ നാല് സിനിമകൾ ഈ കൂട്ടുകെട്ടിൽ വെള്ളിത്തിരയിലെത്തി. ആൾക്കൂട്ടത്തിൽ തനിയെ, അക്ഷരങ്ങൾ, ഉയരങ്ങളിൽ, അടിയൊഴുക്കുകൾ എന്നിവയാണി​വ. ഉയരങ്ങളിൽ എന്ന എക്കാലത്തെയും മികച്ച ക്രൈം ത്രില്ലർ നായക പദവിയിലേക്ക് മോഹൻലാലിനും വഴിയൊരുക്കി. പിന്നീട് ഇടനിലങ്ങൾ, രംഗം, അനുബന്ധം, അഭയം തേടി എന്നീ ഐ.വി. ശശി സിനിമകൾക്ക് കൂടി എം.ടി തൂലിക ചലിപ്പിച്ചു.
12 തിരക്കഥകൾ ഹരിഹരന് വേണ്ടി എഴുതി. 1979 ൽ ഇടവഴിയിലെ പൂച്ച മിണ്ടാ പൂച്ച എന്ന ചിത്രത്തിന് വേണ്ടിയാണ് ആദ്യമായി ഒന്നിച്ചത്. പിന്നീട് ആറ് വർഷങ്ങൾ എം.ടി.യുടെ ഒരു തിരക്കഥയ്ക്ക് വേണ്ടി ഹരിഹരന് കാത്തിരിക്കേണ്ടി വന്നു. 1986 ൽ പഞ്ചാഗ്നിയിലൂടെ വീണ്ടും ഒന്നിച്ചു. തുടർന്ന് നഖക്ഷതങ്ങൾ, അമൃതംഗമയ, ഒരു വടക്കൻ വീരഗാഥ, പരിണയം, എന്ന് സ്വന്തം ജാനകിക്കുട്ടി, പഴശ്ശി​രാജ തുടങ്ങി കലാമൂല്യം കൊണ്ട് പ്രേക്ഷകരെ കീഴടക്കിയ ചിത്രങ്ങൾ ഈ കൂട്ടുകെട്ടിൽ ഉണ്ടായി. 2013 ൽ പുറത്തിറങ്ങിയ ഏഴാമത്തെ വരവാണ് ഇരുവരും ഒന്നിച്ച് പ്രവർത്തിച്ച അവസാന സിനിമ.

മമ്മൂട്ടി​ക്കും മോഹൻലാലി​നും

ഇടമൊരുക്കി​

ഒട്ടേറെ തിരക്കഥകളിൽ മോഹൻലാലിനെയും മമ്മൂട്ടിയേയും ഒന്നിപ്പിച്ചു എന്ന ഖ്യാതിയും എം.ടിക്ക് സ്വന്തമാണ്. 1980 കളിൽ എം.ടിയുടെ തിരക്കഥയിൽ ഐ.വി. ശശി പകർത്തിയ സിനിമകളാണ് മമ്മൂട്ടിയുടെയും മോഹൻലാലിന്റെയും കരിയറി​ന് കരുത്തായത്. ഒരു നോട്ടം കൊണ്ടോ അർദ്ധോക്തിയിൽ മുറിഞ്ഞു പോയ വാക്കുകൾ കൊണ്ടോ പ്രേക്ഷകരെ ഈറനണിയിച്ച ഒട്ടേറെ കഥാപാത്രങ്ങളെ എം.ടി ഇരുവർക്കുമായി പകുത്തു നൽകി. ആൾക്കൂട്ടത്തി​ന് നടുവിൽ ഉത്സവാരവങ്ങളോടെ ചിത്രങ്ങളൊരുക്കിയിരുന്ന ഐ.വി​. ശശിയെയും സമാധാനവും സാവകാശവും പശ്ചാത്തലമാക്കിയ ഹരിഹരനെയും ചേർത്തു നി​റുത്തി​യ എം.ടി​ മലയാള സിനിമയുടെ ഗൃഹപാഠമാണ്.