തൃശൂർ : സംസ്ഥാന സാമൂഹ്യ നീതി വകുപ്പിന്റെ നേതൃത്വത്തിൽ ഇന്ന് അന്താരാഷ്ട്ര ഭിന്നശേഷി ദിനാചരണം 'ഉണർവ് 2024' തൃശൂർ വി.കെ.എൻ ഇൻഡോർ സ്റ്റേഡിയത്തിൽ സംഘടിപ്പിക്കുമെന്ന് മന്ത്രി ആർ.ബിന്ദു വാർത്താസമ്മേളനത്തിൽ പറഞ്ഞു. രാവിലെ പത്തിന് മന്ത്രി ഉദ്ഘാടനം ചെയ്യും. മന്ത്രി കെ.രാജൻ അദ്ധ്യക്ഷനാകും. പി.ബാലചന്ദ്രൻ എം.എൽ.എ മുഖ്യാതിഥിയാകും. സംസ്ഥാന ഭിന്നശേഷി പുരസ്‌കാരങ്ങളുടെ സമർപ്പണം, വിദ്യാഭ്യാസ സ്ഥാപനങ്ങളിൽ ഭിന്നശേഷി വിദ്യാർത്ഥികളെ പഠനത്തിൽ സഹായിക്കുന്ന മികച്ച എൻ.എസ്.എസ്, എൻ.സി.സി, എസ്.പി.സി യൂണിറ്റുകൾക്കുള്ള സഹചാരി പുരസ്‌കാരം സമ്മാനിക്കൽ, ഭിന്നശേഷിക്കാരുടെ കലാവതരണം എന്നിവയുണ്ടാകും. മുഹമ്മദ് യാസിൻ പ്രചോദാത്മക പ്രഭാഷണം നടത്തും. സെറിബ്രൽ പാൾസിയെ അതിജീവിച്ച് സംവിധായകനായ കേഷ് കൃഷ്ണൻ കൂരമ്പാല അതിഥിയായെത്തും. മുഹമ്മദ് യാസിന്റെ സംഗീത വിരുന്നും ഭിന്നശേഷിക്കാരെ ഉൾപ്പെടുത്തി രൂപം നൽകിയ റിഥം ഓർക്കസ്ട്രയുടെ കലാവിരുന്നും അങ്ങേറും. 20 വിഭാഗങ്ങളിലായി 31 പേർക്ക് ഭിന്നശേഷി പുരസ്‌കാരം സമ്മാനിക്കും.