തൃപ്രയാർ : വിജ്ഞാന വിനിമയം ധാർമിക ബോധത്തിലധിഷ്ഠിതമായി നടക്കുമ്പോൾ മാത്രമാണ് മാതൃകായോഗ്യരായ തലമുറയെ സൃഷ്ടിക്കാൻ കഴിയൂവെന്ന് ഇന്ത്യൻ ഗ്രാൻഡ് മുഫ്തി കാന്തപുരം അബൂബക്കർ മുസ്‌ലിയാർ. വാടാനപ്പിള്ളി ഇസ്‌റയുടെ കീഴിൽ തളിക്കുളത്ത് നിർമ്മിച്ച തൈ്വബ ഗാർഡൻ വിമൺസ് വില്ലേജിന്റെ ഉദ്ഘാടനം നിർവഹിക്കുകയായിരുന്നു അദ്ദേഹം. സ്ത്രീ ശാക്തീകരണ വിദ്യാഭ്യാസ പ്രവർത്തനങ്ങൾ സ്ത്രീകൾക്കിടയിൽ വ്യാപകമായി വളർന്ന് പടരണം. അത്തരം പ്രവർത്തനങ്ങൾക്ക് വലിയ ചുവടുവെപ്പാണ് ഇസ്‌റ തൈ്വബ ഗാർഡൻ വിമൺസ് വില്ലേജെന്ന് കാന്തപുരം പറഞ്ഞു.
സമ്മേളനത്തിൽ സ്വാഗതസംഘം ചെയർമാൻ ബാദുഷ സുൽത്താൻ അദ്ധ്യക്ഷനായി. എസ്.വൈ.എസ് സംസ്ഥാന ജനറൽ സെക്രട്ടറി ഡോ. അബ്ദുൽ ഹക്കീം അസ്ഹരി, സയ്യിദ് അലി ബാഫഖി തങ്ങൾ, സയ്യിദ് ശറഫുദ്ധീൻ ജമലുല്ലൈലി, നാസർ കല്ലയിൽ, താഴപ്ര മുഹ്‌യുദ്ധീൻകുട്ടി മുസ്‌ലിയാർ, സയ്യിദ് ഫസൽ തങ്ങൾ, ജലാൽ ഹാജി, ബഷീർ റഹ്മാനി, ഹുസൈൻ തങ്ങൾ, പി.എം.എ. റഹീം ഹാജി, ഡോ. കരീം വെങ്കിടങ്ങ്, പി.കെ. ബാവ ദാരിമി, പി.എസ്. മുഹമ്മദ് അലി, റാഫി സഖാഫി എന്നിവർ പ്രസംഗിച്ചു. ഇസ്‌റ പ്ലസ് ടു വിദ്യാർത്ഥികൾ പുറത്തിറക്കിയ മൊബൈൽ ആപ്പ്, ഇസ്‌റ വിമൺസ് കോളേജ് വിദ്യാർത്ഥിനികൾ പുറത്തിറക്കിയ മാഗസിൻ എന്നിവ പ്രകാശനം ചെയ്തു.