തൃപ്രയാർ: സമൂഹത്തിൽ ജനാധിപത്യമുണ്ടെങ്കിലേ ജനാധിപത്യ വ്യവസ്ഥിതിക്ക് നിലനിൽക്കാനാവൂ എന്ന് കവി പി.എൻ. ഗോപീകൃഷ്ണൻ. അത്യന്തം ജനാധിപത്യവിരുദ്ധമായ ജാതിവ്യവസ്ഥ നിലനിന്ന തിരുവിതാംകൂറിലാണ് സർവമത സമ്മേളനം നടന്നത്. സമൂഹത്തെ ജനാധിപത്യവത്കരിക്കുന്നതിനുള്ള ക്രിയാത്മക ഇടപെടലായാണ് ശ്രീനാരായണ ഗുരു അതിന് നേതൃത്വം നൽകിയത്. ആലുവ സർവമത സമ്മേളനത്തിന്റെ നൂറാം ആണ്ടിന്റെ ഭാഗമായി തളിക്കുളത്ത് ഗുരുവിന്റെ ജനാധിപത്യ സങ്കൽപ്പം സംബന്ധിച്ച സെമിനാറിൽ അദ്ധ്യക്ഷനായി സംസാരിക്കുകയായിരുന്നു ഗോപീകൃഷ്ണൻ. ജാതിഘടനയുടെ വിവേചനത്തിനെതിരായും മതപരമായ സംഘർഷങ്ങൾ നീക്കുന്നതിനും നടത്തിയ പ്രായോഗിക ഇടപെടലുകളുടെ ഭാഗമായിരുന്നു സർവമത സമ്മേളനമെന്നും അത് പുതിയ കാലത്ത് കൂടുതൽ പ്രസക്തമാണെന്നും ഡോ. അമൽ സി. രാജൻ അഭിപ്രായപ്പെട്ടു. കെ.ജി. കൃഷ്ണകുമാർ, പി.എൻ. പ്രോവിന്റ്, ടി.ആർ. രമേഷ്, മോചിത മോഹനൻ, മുഹമ്മദ് ഹാഷിം, കെ.ആർ. പ്രഭ, എം.എ. റിയാദ്, പി.വൈ. സലിം തുടങ്ങിയവർ സംസാരിച്ചു.