ഗുരുവായൂർ: ക്ഷേത്രപരിസരത്ത് നഗരസഭ ആരംഭിക്കുന്ന വിവാഹ രജിസ്‌ട്രേഷൻ കേന്ദ്രത്തിന്റെ ഉദ്ഘാടനം 20ന് വൈകീട്ട് നാലിന് മന്ത്രി എം.ബി.രാജേഷ് നിർവഹിക്കും. കിഴക്കേ നടയിലെ ദേവസ്വം വൈജയന്തി ബിൽഡിംഗിലാണ് കേന്ദ്രം ആരംഭിക്കുന്നതെന്ന് നഗരസഭ അധ്യക്ഷൻ എം.കൃഷ്ണദാസ് വാർത്താസമ്മേളനത്തിൽ അറിയിച്ചു. നഗരസഭ ഓഫീസിൽ എത്താതെ തന്നെ കല്യാണ മണ്ഡപത്തിന് തൊട്ടടുത്തുള്ള ഈ കേന്ദ്രത്തിലെത്തി നവദമ്പതിമാർക്ക് രജിസ്‌ട്രേഷൻ നടത്താം. എൻ.കെ.അക്ബർ എം.എൽ.എ അധ്യക്ഷത വഹിക്കും. ദേവസ്വം ചെയർമാൻ ഡോ. വി.കെ.വിജയൻ മുഖ്യാതിഥിയാകും. സ്റ്റാൻഡിംഗ് കമ്മിറ്റി ചെയർമാൻമാരായ എ.എം.ഷെഫീർ, എ.എസ്.മനോജ്, എ.സായിനാഥൻ, നഗരസഭ സെക്രട്ടറി എച്ച്.അഭിലാഷ് കുമാർ എന്നിവർ വാർത്താസമ്മേളനത്തിൽ പങ്കെടുത്തു.