തൃപ്രയാർ: കോതകുളം ബീച്ചിൽ ഇന്ന് മുതൽ 25 വരെ സ്‌നേഹാരാമം ഫെസ്റ്റിവൽ സംഘടിപ്പിക്കുമെന്ന് സി.സി. മുകുന്ദൻ എം.എൽ.എ അറിയിച്ചു. ഇന്ന് വൈകീട്ട് നാലിന് ഘോഷയാത്രയ്ക്കു ശേഷം നടക്കുന്ന ചടങ്ങിൽവച്ച് മന്ത്രി കെ. രാജൻ ഫെസ്റ്റിവൽ ഉദ്ഘാടനം ചെയ്യും. സി.പി. സാലിഹ്, ഷൈൻ തട്ടുപറമ്പിൽ, ഡോ. പി.ആർ. സിദ്ധാർത്ഥ ശങ്കർ എന്നിവരെ ആദരിക്കും. തുടർന്നുള്ള ദിവസങ്ങളിൽ നേത്രപരിശോധനാ ക്യാമ്പ്, ആയുർവേദ മെഡിക്കൽ ക്യാമ്പ്, കവിയരങ്ങ്, സാംസ്‌കാരിക സമ്മേളനം, കലാപരിപാടികൾ, കുടുംബശ്രീയുടെ നേതൃത്വത്തിൽ സ്റ്റാൾ, കുടുംബശ്രീ ജില്ലാ മിഷന്റെ നേതൃത്വത്തിൽ ലിംഗാധിഷ്ഠിത അതിക്രമങ്ങൾക്കെതിരെയുള്ള രംഗം അവതരിപ്പിക്കുന്ന നൃത്താവിഷ്‌കാരം, ഫാഷൻ ഷോ എന്നിവ നടക്കും. 25ന് വൈകുന്നേരം അഞ്ചിന് സമാപന സമ്മേളനം മണപ്പുറം സി.ഇ.ഒ: വി.പി. നന്ദകുമാർ ഉദ്ഘാടനം ചെയ്യും. 31 വരെ മെഗാ കാർണിവലും പെറ്റ് ഷോ, അക്വാറ്റിക് ഷോ, ഫളവേഴ്‌സ് ഷോ, ഫുഡ് ഫെസ്റ്റ് എന്നിവ ഉണ്ടാകും. സംഘാടകസമിതി ചെയർപേഴ്‌സൺ മല്ലിക ദേവൻ, പി.ആർ. ബാബു, ആർ.എം. മനാഫ്, വൈശാഖ് വേണുഗോപാൽ എന്നിവരും വാർത്താസമ്മേളനത്തിൽ പങ്കെടുത്തു.