ഇരിങ്ങാലക്കുട: ക്രൈസ്റ്റ് കോളേജിന് സമീപത്ത് നിന്നും കാട്ടൂങ്ങച്ചിറയിലേയ്ക്ക് പോകുന്ന ഫാ. ഡിസ്മാസ് റോഡിൽ മാലിന്യം തള്ളുന്നവരും അനാശ്യാസ പ്രവൃത്തികളിൽ ഏർപ്പെടുന്നവരും ഇനി ക്യാമറക്കണ്ണിൽ കുടുങ്ങും. ഏറെ നാളുകളായി പ്രദേശത്ത് മാലിന്യം തള്ളുന്നത് പതിവ് കാഴ്ച്ചയായിരുന്നു. കാറ്ററിംഗ് മാലിന്യവും വീടുകളിലെ മാലിന്യവുമെല്ലാം തന്നെ കോളേജും മറ്റ് വ്യവസായ ശാലകളും സ്ഥിതി ചെയ്യുന്ന റോഡിൽ അലക്ഷ്യമായി വലിച്ചെറിഞ്ഞ് പോകുന്നത് പലപ്പോഴും പ്രദേശവാസികൾക്ക് ബുദ്ധിമുട്ട് സൃഷ്ടിച്ചിരുന്നു. തെരുവ് നായകളുടെ ശല്യവും വ്യാപകമായിരുന്നു. ഇതേത്തുടർന്നാണ് ഒട്ടോമാറ്റിക്ക് നമ്പർ പ്ലേറ്റ് ഡിറ്റക്്ഷനോട് കൂടിയ സി.സി.ടി.വി ക്യാമറ പൊലീസിന്റെ അനുവാദത്തോടെ പ്രദേശത്ത് സ്ഥാപിച്ചിരിക്കുന്നത്. മാലിന്യം തള്ളുന്നവരെയും അനാശാസ്യ പ്രവർത്തനങ്ങൾ നടത്തുന്നവരെയും തെളിവ് സഹിതം പിടികൂടി നിയമ നടപടികൾ സ്വീകരിക്കാൻ സംവിധാനം ഏറെ സഹായകമാകും.