കൊടുങ്ങല്ലൂർ : കരുതലും കൈത്താങ്ങും കൊടുങ്ങല്ലൂർ താലൂക്ക്തല പരാതി പരിഹാര അദാലത്തിൽ ലഭിച്ച 267 അപേക്ഷകളിൽ ഉടൻ തീർപ്പുണ്ടാകും. മന്ത്രിമാരായ കെ. രാജൻ, ഡോ. ആർ. ബിന്ദു എന്നിവർ മുഴുവൻ പരാതികളിലും അടിയന്തരമായി പരിഹാരം കാണാൻ ബന്ധപ്പെട്ട വകുപ്പ്തല ഉദ്യോഗസ്ഥരോട് നിർദ്ദേശിച്ചു. അദാലത്തിൽ 11 പേർക്ക് പുതിയ റേഷൻ കാർഡുകളും 10 പേർക്ക് പട്ടയങ്ങളും വിതരണം ചെയ്തു. അദാലത്തിൽ ഓൺലൈനായി 142 അപേക്ഷകളും നേരിട്ട് 125 അപേക്ഷകളും ലഭിച്ചു. ഓൺലൈനായി ലഭിച്ച 142 അപേക്ഷകളിൽ 67 അപേക്ഷകർ റവന്യൂ വകുപ്പ് മന്ത്രി കെ. രാജൻ, ഉന്നത വിദ്യാഭ്യാസ, സാമൂഹിക നീതി വകുപ്പ് മന്ത്രി ഡോ. ആർ. ബിന്ദു എന്നിവരെ നേരിൽ കണ്ടും പരാതികൾ ബോധിപ്പിച്ചു. അദാലത്തിൽ 125 അപേക്ഷകൾ പുതുതായി സ്വീകരിച്ചതിൽ 58 അപേക്ഷകർ മന്ത്രിമാരെ നേരിൽ കണ്ട് പരാതി ബോധിപ്പിച്ചു. മന്ത്രിമാരോടൊപ്പം എം.എൽ.എമാർ, ജനപ്രതിനിധികൾ, കളക്ടർ, സബ് കളക്ടർ, ആർ.ഡി.ഒ, വിവിധ വകുപ്പുകളിലെ ഉന്നതതല ഉദ്യോഗസ്ഥർ തുടങ്ങിയവരും പങ്കെടുത്തു.