തിരുവനന്തപുരം: വൈദ്യുതി നിരക്ക് വർദ്ധനയിലൂടെ ജനത്തെ കൊള്ളയടിക്കാനുള്ള നീക്കത്തിന് പിന്നിൽ പവർ ബ്രോക്കർമാരാണെന്ന് കോൺഗ്രസ് പ്രവർത്തക സമിതി അംഗം രമേശ് ചെന്നിത്തല. വൈദ്യുതി നിരക്കിൽ കോടികളുടെ അധിക ഭാരമാണ് ജനങ്ങൾക്ക് മേൽ പിണറായി സർക്കാർ കെട്ടിവയ്ക്കുന്നത്. ന്യൂക്ളിയർ പവർ കോർപ്പറേഷൻ ഉൾപ്പെടെ കുറഞ്ഞ നിരക്കിൽ വൈദ്യുതി നൽകാൻ തയ്യാറുള്ളപ്പോഴാണ് അദാനിമാർക്ക് വേണ്ടി സർക്കാർ പ്രവർത്തിക്കുന്നത്. നെയ് വേലി ലിഗ്നെറ്റ് കോർപ്പറേഷനുമായി ചർച്ച നടന്നിട്ടുണ്ടോ എന്ന് വൈദ്യുതി വകുപ്പ് വ്യക്തമാക്കണം. ആര്യാടൻ മുഹമ്മദ് വൈദ്യുതി മന്ത്രിയായിരിക്കെ വൈദ്യുതി വകുപ്പ് ഒപ്പു വച്ച കരാർ ആർക്ക് വേണ്ടിയാണ് സർക്കാർ റദ്ദാക്കിയത്. സർക്കാർ നടത്തിയത് അഴിമതിയാണ്. ഇക്കാര്യത്തിൽ വൈദ്യുതി മന്ത്രിയും മുഖ്യമന്ത്രിയും ഒരുപോലെ കുറ്റക്കാരാണെന്നും അദ്ദേഹം പറഞ്ഞു.