പാലോട്: രണ്ട് പഞ്ചായത്തുകളിൽ ശുദ്ധമായ കുടിവെള്ളം ലഭ്യമാക്കുക എന്ന ലക്ഷ്യത്തോടെ 2009ൽ 60കോടി രൂപ ചെലവിൽ ആരംഭിച്ച കുടിവെള്ള പദ്ധതി നിശ്ചലമാകുന്നു.നിലവിൽ പദ്ധതിക്കായി എത്തിച്ച പൈപ്പുകൾ ഉദ്യോഗസ്ഥരുടെ മൗനാനുവാദത്തോടെ മറ്റൊരു കുടിവെള്ള പദ്ധതിക്കായി മാറ്റി. ഇതറിഞ്ഞെത്തിയ നാട്ടുകാർ തടഞ്ഞതോടെ പൈപ്പ് മാറ്റുന്നത് നിറുത്തി.എന്നാൽ ഇതിനോടകം നാല് ലോറി പൈപ്പുകൾ മാറ്റി. നന്ദിയോട് ഗ്രാമപഞ്ചായത്തിൽ മുഴുവനായും ആനാട് ഗ്രാമപഞ്ചായത്തിൽ 90 ശതമാനം പ്രദേശങ്ങളിലും ഈ പദ്ധതി പൂർത്തിയായാൽ കുടിവെള്ള പ്രശ്നത്തിന് പരിഹാരമാകുമായിരുന്നു.

നിരവധി സമരപരമ്പരകൾക്കൊടുവിൽ 2021ജനുവരി ഏഴിന് 16കോടി രൂപ കൂടി പദ്ധതിക്കായി അനുവദിച്ച് സർക്കാർ ഉത്തരവായി. 2021ഫെബ്രുവരി 6ന് രണ്ടാംഘട്ട നിർമ്മാണ പ്രവർത്തനങ്ങളുടെ ഉദ്ഘാടനവും നടന്നു. ഒന്നാം ഘട്ടത്തിൽ സ്റ്റോറേജ് പ്ലാന്റ്, എയർ ക്ലാരിയേറ്റർ, രണ്ട് ഫ്ലാഷ്മിക്സർ, ക്ലാരി ഫയർഫോക്കുലേറ്റർ എന്നിവ പൂർത്തിയായി.

യാഥാർത്ഥ്യമായില്ല

രണ്ടാം ഘട്ടത്തിൽ ആനക്കുഴിയിൽ പത്തുലക്ഷം ലിറ്റർ ടാങ്കും, പാലോട്ടെ പമ്പ് ഹൗസും, 630 കെ.വി, 250 കെ.വി കപ്പാസിറ്റിയുള്ള രണ്ട് ട്രാൻസ്ഫോർമറുകളും 63കിലോമീറ്റർ നീളത്തിൽ ഗാർഹിക പൈപ്പുലൈനുകളും പാലോട്ടെ പബ്ബിംഗ് സ്ഥലത്ത് 80എച്ച്.പി പമ്പ് സ്ഥാപിക്കുമെന്നും ആലുങ്കുഴി, താന്നിമൂട്, ചുള്ളിമാനൂർ, കൈതക്കാട് എന്നിവിടങ്ങളിലെ ഓവർ ഹെഡ് ടാങ്കുകളുടെ നിർമ്മാണവും നടക്കുമെന്ന് പ്രഖ്യാപിച്ചെങ്കിലും യാഥാർത്ഥ്യമായില്ല.

പദ്ധതി അവതാളത്തിൽ

നന്ദിയോട് പഞ്ചായത്തിന്റെ നേതൃത്വത്തിൽ ആലുങ്കുഴിൽ 15സെന്റ് സ്ഥലം 7ലക്ഷത്തിനും, താന്നിമൂട്ടിൽ 15സെന്റ് സ്ഥലം 15ലക്ഷത്തിനും, ആനക്കുഴിയിൽ 10സെന്റ് സ്ഥലം 5ലക്ഷത്തിനും വാങ്ങി വാട്ടർ അതോറിട്ടിക്ക് കൈമാറിയെങ്കിലും ആനക്കുഴിയിലെ ടാങ്ക് നിർമ്മാണമല്ലാതെ ഒന്നും നടന്നില്ല. ആലുങ്കുഴിയിൽ കുടിവെള്ള ടാങ്ക് നിർമ്മാണത്തിനായി വാങ്ങിയ പ്രദേശത്ത് ഉണ്ടായിരുന്ന കൂറ്റൻപാറ പദ്ധതിക്ക് തടസമാകുമെന്നതിനാൽ പൊട്ടിച്ച് മാറ്റാൻ ടെൻഡർ നൽകിയെങ്കിലും ടെൻഡറെടുത്ത വ്യക്തി പാറ പൊട്ടിച്ച് മാറ്റാത്തതിനാലും ടെൻഡർ തുക അടയ്ക്കാൻ തയ്യാറാകാത്തതിനാലും ക്യാൻസൽ ചെയ്തു. വീണ്ടും ടെൻഡർ നൽകി ലേലം നടന്നെങ്കിലും സർക്കാർ നിശ്ചയിച്ച തുക ലഭിക്കാത്തതിനാൽ ലേലം ക്യാൻസൽ ചെയ്യുകയായിരുന്നു. ഇനി നടപടിക്രമങ്ങൾ പൂർത്തിയാക്കി ടെൻഡർ നടക്കണമെങ്കിൽ മാസങ്ങളെടുക്കുമെന്നതാണ് യാഥാർത്ഥ്യം.

ആനക്കുഴിയിലെ വാട്ടർ ടാങ്കും പാലോട്ടെ മെയിൻ ടാങ്കിനോടനുബന്ധിച്ച് ട്രാൻസ്ഫോർമറുകളും ഗാർഹിക കുടിവെള്ള വിതരണത്തിന് പൈപ്പുകളും, 80 എച്ച്.പി പമ്പും സ്ഥാപിച്ചാൽ നന്ദിയോട് ഗ്രാമപഞ്ചായത്തിലെ കുടിവെള്ള പ്രശ്നത്തിന് 90ശതമാനത്തോളം പരിഹാരമാകുമായിരുന്നു.