തിരുവനന്തപുരം : 175കോടി രൂപയുടെ അധിക സർക്കാർ ഗ്യാരന്റി അനുവദിക്കാൻ തീരുമാനിച്ചതോടെ നടപ്പ് സാമ്പത്തിക വർഷത്തിൽ 375കോടി രൂപയുടെ വായ്‌പ വിതരണം നടത്താൻ സംസ്ഥാന വനിത വികസന കോർപ്പറേഷൻ നടപടി തുടങ്ങി. ദേശീയ ന്യൂനപക്ഷ വികസന ധനകാര്യ കോർപ്പറേഷനിൽ നിന്ന് വായ്‌പ സ്വീകരിക്കാനാണ് ഈ ഗ്യാരന്റി അധികമായി അനുവദിച്ചത്. ഇതിലൂടെ ഈ സാമ്പത്തിക വർഷം 75,000വനിതകൾക്ക് തൊഴിലവസരങ്ങൾ നൽകാനാകുമെന്ന് മന്ത്രി വീണാ ജോർജ് അറിയിച്ചു. മാത്രമല്ല ന്യൂനപക്ഷ വിഭാഗത്തിന് 175കോടി രൂപ വായ്‌പാവിതരണം നടത്തുന്നതിലൂടെ 34,000 വനിതകൾക്കും തൊഴിലവസരങ്ങൾ നൽകാനാവും. കഴിഞ്ഞ സാമ്പത്തിക വർഷത്തെക്കാൾ 6000 ഓളം സ്ത്രീകൾക്ക് അധികമായി മിതമായ നിരക്കിൽ സ്വയം തൊഴിൽ വായ്പ ലഭ്യമാക്കാൻ ഇത് മുഖേന സാധിക്കുമെന്നും മന്ത്രി വ്യക്തമാക്കി.ഇപ്പോൾ 175കോടിയുടെ സർക്കാർ ഗാരന്റി കൂടി നൽകിയതോടെ ആകെ 1295.56 കോടി രൂപയുടെ ഗ്യാരന്റിയാണ് കോർപറേഷനുള്ളത്. ദേശീയ ധനകാര്യ കോർപ്പറേഷനുകളിൽ നിന്നും വായ്പയെടുക്കുന്നതിലേക്ക് 2016വരെ 140കോടി രൂപയുടെ ഗ്യാരന്റി മാത്രമാണ് സ്ഥാപനത്തിനുണ്ടായിരുന്നത്.

2023-24 സാമ്പത്തിക വർഷത്തിൽ 36,105വനിതകൾക്ക് 340കോടി രൂപ സ്വയം തൊഴിൽ സംരംഭം ആരംഭിക്കുന്നതിന് വിതരണം ചെയ്തു. സർക്കാരിൽ നിന്നും ലഭ്യമായ അധിക ഗ്യാരന്റി പ്രയോജനപ്പെടുത്തി ന്യൂനപക്ഷ വിഭാഗത്തിൽപെട്ട വനിതകൾക്ക് നാളിതുവരെ 1,12,000ഓളം വരുന്ന തൊഴിലവസരങ്ങൾ സൃഷ്ടിക്കാൻ സംസ്ഥാന വനിതാ വികസന കോർപ്പറേഷന് സാധിച്ചു. കൂടാതെ നടപ്പ് സാമ്പത്തിക വർഷത്തിൽ ഇതുവരെ 22,580 വനിതകൾക്ക് 170 കോടി രൂപ വിതരണം ചെയ്തു.