ശിവഗിരി : ശ്രീനാരായണ സന്ദേശപ്രചരണം ജീവിതത്തിന്റെ ഭാഗമായി സ്വീകരിച്ച ഡോ. ഗീതാ സുരാജിനെയും എം. കെ. ഹരികുമാറിനെയും ശിവഗിരിമഠം ആദരിക്കും. കഴിഞ്ഞ ആറുദശാബ്ദക്കാലമായി ഭാരതത്തിനകത്തും പുറത്തുമായി പ്രഭാഷണപരമ്പര നടത്തുന്ന ഡോ. ഗീതാ സുരാജ് ഒരു ഡസനിലധികം ശ്രീനാരായണ സംബന്ധിയായ കൃതികളും രചിച്ചിട്ടുണ്ട്. ഗീതാസുരാജും ഭർത്താവ് സുരാജും ഗുരുദേവനെക്കുറിച്ചെഴുതിയ തീസിസിനാണ് ഡോക്ടറേറ്റ് നേടിയത്. ഗുരുസന്ദേശ പ്രചരണത്തിന്റെ ഭാഗമായി ഡോ. ഗീതാ സുരാജിന് സമഗ്രസംഭാവനാ പുരസ്കാരം നൽകും.

ഗുരുപ്രസ്ഥാനത്തെയും കൃതികളെയും ആസ്പദമാക്കി നിരവധി പഠനങ്ങളും പ്രഭാഷണങ്ങളും നടത്തിയിട്ടുള്ള എം. കെ. ഹരികുമാർ ഗുരുദേവന്റെ ജീവിതത്തെ ആസ്പദമാക്കി എഴുതിയ ശ്രീനാരായണായ എന്ന ബ്രഹദ് നോവലിന്റെ പേരിലാണ് ആദരിക്കപ്പെടുന്നത്. ശ്രീനാരായണായ എന്ന നോവലിന് നിരവധി പ്രസ്ഥാനങ്ങൾ ഇതിനകം പുരസ്കാരങ്ങൾ നല്‍കിയിട്ടുണ്ട്. ശിവഗിരി തീർത്ഥാടനത്തിന്റെ ഭാഗമായി 29 ന് രാവിലെ 10 മണിക്ക് നടക്കുന്ന ഗുരുധർമ്മ പ്രചരണ സഭയുടെ സമ്മേളനത്തിൽ എം. കെ. ഹരികുമാറിനും ഉച്ചയ്ക്ക് 2 മണിക്ക് നടക്കുന്ന മാതൃ - യുവജന സമ്മേളനത്തിൽ ഡോ. ഗീതാസുരാജിനും പുരസ്കാരങ്ങൾ നല്‍കും.