തിരുവനന്തപുരം: കേരള സർക്കാർ പങ്കാളിത്തത്തോടെ പ്രവർത്തിക്കുന്ന ഐ.സി.ടി അക്കാഡമി ഒഫ് കേരളയും അൺസ്റ്റോപ്പും സംയുക്തമായി ടെക്‌പ്രേമികൾക്കായി 'ഐ.സി.ടി.എ.കെ ടെകാത്‌ലോൺ 2024' മത്സരം സംഘടിപ്പിക്കുന്നു. നൂതന ആശയങ്ങൾ, സർഗാത്മകത,സഹകരണം എന്നിവ വളർത്തിയെടുക്കുകയെന്ന ലക്ഷ്യത്തോടെ രൂപകല്പന ചെയ്ത മത്സരം ടെക്‌നോളജിയിൽ പ്രതിഭ തെളിയിക്കാൻ ആഗ്രഹിക്കുന്നവർക്കുള്ള മികച്ച വേദിയാണ്.

നൂതന ആശയ സമർപ്പണം,പ്രശ്നപരിഹാരം,കോഡ് ഗോൾഫ്,ടെക് ക്വിസ് എന്നീ ഘട്ടങ്ങളിലായി നടക്കുന്ന മത്സരത്തിൽ ബിരുദ, ബിരുദാനന്തര വിദ്യാർത്ഥികൾക്ക് പങ്കെടുക്കാം. താത്പര്യമുള്ളവർക്ക് 2025 ജനുവരി 08 വരെ tinyurl.com/techathlon-24 എന്ന ലിങ്കിലൂടെ രജിസ്റ്റർ ചെയ്യാം. ഐ.സി.ടി അക്കാഡമിയുടെ 'ഇക്‌സെറ്റ് 2024'ൽ പങ്കെടുത്തവർക്ക് രജിസ്‌ട്രേഷൻ സൗജന്യമാണ്. മറ്റുള്ളവർക്ക് 599 രൂപയാണ് രജിസ്‌ട്രേഷൻ ഫീസ്. ഒരുമാസം നീണ്ടു നിൽക്കുന്ന ആദ്യപാദ മത്സരങ്ങൾക്ക് ശേഷം ഫെബ്രുവരി രണ്ടാംവാരം കൊച്ചിയിൽ ഗ്രാൻഡ് ഫിനാലെയോടെ ടെകാത്‌ലോൺ സമാപിക്കും.

ആകെ ഒരുലക്ഷം രൂപയുടെ സമ്മാനങ്ങളാണ് വിജയികൾക്ക് ലഭിക്കുക. 50,000 രൂപയാണ് ഒന്നാം സമ്മാനം. റണ്ണർഅപ്പ്,സെക്കൻഡ് റണ്ണർഅപ്പ്, മികച്ച പ്രോജക്ടിനും ക്യാഷ് പ്രൈസ് ലഭിക്കും.