ആറ്റിങ്ങൽ: ക്രിസ്മസ് അവധിക്കാലത്തും അവധി ഒഴിവാക്കി നാട്ടിൽ ബോധവത്കരണവുമായി സ്കൂൾ കുട്ടികൾ. വക്കം ഗവ.ഹയർസെക്കൻഡറി സ്കൂളിലെ വി.എച്ച്.എസ്.ഇ വിഭാഗവും അമൃത് മിഷനും ചിറയിൻകീഴ് താലൂക്ക് ടൂറിസം സഹകരണ സംഘവും സംയുക്തമായാണ് ആറ്റിങ്ങൽ കച്ചേരി നടയിൽ ബോധവത്കരണവും ക്രിസ്മസ് ആഘോഷവും സംഘടിപ്പിച്ചത്. സ്കൂളിലെ ഒന്നാംവർഷ വി.എച്ച്.എസ്.ഇ വിഭാഗം എൻ.എസ്.എസ് വിദ്യാർത്ഥികളാണ് ജലം ജീവിതം എന്ന തെരുവ് നാടകവുമായി അരങ്ങിലെത്തിയത്.
അമൂല്യമായ ജലസ്രോതസുകൾ സംരക്ഷിക്കേണ്ടതിന്റെ ആവശ്യകതയെക്കുറിച്ച് വിദ്യാർത്ഥികൾ സന്ദേശം നൽകി. ചിറയിൻകീഴ് താലൂക്ക് ടൂറിസം സഹകരണസംഘം പ്രസിഡന്റ് ഇളമ്പ ഉണ്ണികൃഷ്ണൻ,സെക്രട്ടറി രതീഷ് രവീന്ദ്രൻ,വി.എച്ച്.എസ്.ഇ പ്രിൻസിപ്പൽ എം.ഷിമി, പ്രോഗ്രാം ഓഫീസർ ജയകുമാർ എന്നിവർ സംസാരിച്ചു.