ചെറുകോൽ : മാവേലിക്കര ചെറുകോൽ ശുഭാനന്ദാശ്രമത്തിൽ ആനന്ദജി ഗുരുദേവന്റെ 101-ാമത് ഉത്രാടം ജന്മനക്ഷത്ര മഹോത്സവം ഇന്ന് നടക്കും. ഇന്ന് സമാധി മണ്ഡപങ്ങളിൽ പുഷ്പാർച്ചനയും പ്രാർത്ഥനയും നടക്കും. തുടർന്ന് ആശ്രമപ്രദക്ഷിണം, എഴുന്നള്ളത്ത്, എതിരേല്പ് എന്നിവയ്ക്കു ശേഷം 10 ന് ചെന്നിത്തല വാഴക്കൂട്ടം കടവിനു സമീപമുള്ള ശ്രീആനന്ദ മന്ദിരത്തിൽ നിന്ന് ആരംഭിക്കുന്ന ഘോഷയാത്ര കല്ലുംമൂട്, കാരാഴ്മ വഴി ആശ്രമ സന്നിധിയിലെത്തിച്ചേരും. തുടർന്ന് നേർച്ചസ്വീകരണം, പ്രാർത്ഥന എന്നിവയ്ക്കുശേഷം ആശ്രമാധിപതി ദേവാനന്ദ ഗുരുദേവൻ അനുഗ്രഹപ്രഭാഷണം നടത്തും. ഉച്ചയ്ക്ക് സമൂഹസദ്യയ്ക്കു ശേഷം 2 ന് ട്രസ്റ്റ് സെക്രട്ടറി സ്വാമി ഗീതാനന്ദന്റെഅദ്ധ്യക്ഷതയിൽ ജന്മനക്ഷത്ര സമ്മേളനം നടക്കും. മുൻ ഗോവ, മിസോറാം ഗവർണർ അഡ്വ. പി.എസ്.ശ്രീധരൻ പിള്ള ഉദ്ഘാടനം ചെയ്യും. ദേവാനന്ദ ഗുരുദേവൻ അനുഗ്രഹപ്രഭാഷണവും ജ്ഞാനപ്രകാശം ശുഭാനന്ദഗീതം 12-ാം വാല്യം നാമസങ്കീർത്തന പുസ്തകത്തിൻറെ പ്രകാശനവും നടത്തും. യാക്കോബായ സുറിയാനി സഭ കോട്ടയം ഭദ്രാസനാധിപൻ അഭിവന്ദ്യ തോമസ് മാർ തീമോത്തിയോസ് മെത്രാപ്പൊലീത്ത ആശീർവ്വാദവും വള്ളിക്കോട് ശ്രീരാമകൃഷ്ണാശ്രമത്തിലെ സ്വാമി ആപ്തലോകാനന്ദ മുഖ്യ പ്രഭാഷണവും നടത്തും. മാവേലിക്കര മുനിസിപ്പൽ ചെയർമാൻ നൈനാൻ കുറ്റിശ്ശേരിൽ, ചെന്നിത്തല-തൃപ്പെരുന്തുറ ഗ്രാമപഞ്ചായത്ത് പ്രസിഡന്റ് വിജയമ്മ ഫിലേന്ദ്രൻ, ട്രസ്റ്റി സ്വാമി വേദാനന്ദൻ, ശുഭാനന്ദ ദർശനം വേദാന്ത സാംസ്‌കാരിക മാസിക മാനേജിംഗ് എഡിറ്റർ സ്വാമി ജ്യോതിർമയാനന്ദൻ എന്നിവർ ആശംസാപ്രസംഗം നടത്തും. ട്രസ്റ്റി സ്വാമി വിവേകാനന്ദൻ സ്വാഗതവും ട്രസ്റ്റ് ഉപദേശകസമിതി കൺവീനർ അഡ്വ.പി.കെ. വിജയപ്രസാദ് കൃതജ്ഞതയും പറയും. വൈകിട്ട് 5.30 ന് മാവേലിക്കര താലൂക്ക് അർബർ കോ-ഓപ്പറേറ്റീവ് ബാങ്ക് ഓഡിറ്റോറിയത്തിൽ നിന്ന് ആരംഭിക്കുന്ന ജന്മനക്ഷത്ര പ്രകാശയാത്ര മിച്ചൽ ജംഗ്ഷൻ മണ്ഡപത്തിൻ കടവു വഴി ആശ്രമസന്നിധിയിലെത്തിച്ചേരും.