ആലപ്പുഴ : ഗതാഗതപരിഷ്കാരങ്ങൾക്ക് പിന്നാലെ ഓണത്തിരക്കും തുടങ്ങിയതോടെ നഗരം ആകെ കുരുങ്ങി. ജില്ലാ കോടതി പാലം പൊളിച്ചതിന്റെ ഭാഗമായി ഏർപ്പെടുത്തിയ സമാന്തരസംവിധാനങ്ങളിലെല്ലാം കുരുക്ക് മുറുകി. പ്രസ് ​ക്ലബിന്റെ വശത്തുകൂടി വൈ.എം.സി.എ ജംഗ്ഷനിലേക്ക്​ വരുന്ന ഇടുങ്ങിയ വഴിയിൽ​ നാലുചക്ര വാഹനങ്ങളുടെ ഗതാഗതത്തിന്​ നിയ​ന്ത്രണം ഏർപ്പെടുത്തിയത് നേരിയ ആശ്വാസത്തിന് വഴിയൊരുക്കി. തിരക്കുള്ള സമയങ്ങളിൽ ഇവിടെ ഒരുവശത്തേക്ക്​ മാത്രം വാഹനങ്ങൾ കടത്തിവിടാനാണ് നിലവിലെ​ തീരുമാനം.

ഗതാഗതം നിയന്ത്രിക്കാൻ പൊലീസിനെയും നിയോഗിച്ചു. ഈറോഡിൽ ഒരുവാഹനത്തിന്​ മാത്രം കടന്നുപോകാനുള്ള വീതിയാണുള്ളത്​. ഇരുവശങ്ങളിലും നിന്ന്​ വാഹനങ്ങൾ എത്തുന്നത്​ വൻഗതാഗതക്കുരുക്കിന്​ ഇടയാക്കിയിരുന്നു. ഇതിനൊപ്പം സമീപത്തെ സ്കൂളിലേക്ക്​ കുട്ടികളുമായി രക്ഷിതാക്കൾ വാഹനങ്ങളിൽ എത്തുന്നതിനാൽ രാവിലെയും വൈകിട്ടും തിരക്ക്​ നിയന്ത്രണാതീതമാണ്​.

രാവിലെയും വൈകിട്ടും തിരക്ക്​ നിയന്ത്രണാതീതം

1. ജില്ലക്കോടതിഭാഗത്തുനിന്ന്​ തെക്കോട്ടുപോകുന്ന വാഹനങ്ങൾ കോടതിപ്പാലത്തിന്​ സമീപത്തുനിന്ന്​ നഗരചത്വരം വഴി ഇടുങ്ങിയ റോഡിലൂടെ മിനിസിവിൽസ്​റ്റേഷൻ വഴി കനാലിന്​ കുറുകെയുള്ള താൽക്കാലിക പാലം കടന്ന്​ ആലുക്കാസ്​ ഗ്രൗണ്ടിലെത്തുന്ന ക്രമീകരണം സുഗമമല്ല

2. കോടതിപ്പാലം മുതൽ ഔട്ട്​ പോസ്റ്റ്​ ജംഗ്​ഷൻവരെ യാത്രദുരിതപൂർണമാണ്​. ഇത്​ പരിഹരിക്കാൻ ഈ റോഡ്​ ആറുമീറ്റർ വീതിയിൽ ടാറിംഗ് പൂർത്തിയാക്കാൻ കഴിഞ്ഞ ദിവസം കളക്ടറേറ്റിൽ ചേർന്ന യോഗത്തിൽ തീരുമാനിച്ചിരുന്നു

3. ഇതിനൊപ്പം ഈ റോഡിലൂടെ സ്വകാര്യബസുകൾക്ക് കടന്നുപോകാൻ സാധിക്കുമോയെന്ന്​ പരിശോധിക്കാൻ ഉദ്യോഗസ്ഥസംഘത്തെയും നിയോഗിച്ചിട്ടുണ്ട്. നഗരത്തിലെ ഇടറോഡുകളുടെ വീതി താൽക്കാലികമായി കൂട്ടി ഗതാഗതപ്രശ്നം പരിഹരിക്കാൻ കഴിയുമോയെന്നും പരിശോധിക്കും.

ഗതാഗത പരിഷ്കാരം പൂർണ വിജയമല്ല. ബസുകളിൽ യാത്രക്കാർ കുറയുന്നതിനും ധനനഷ്ടത്തിനും നിലവിലെ പരിഷ്കാരം കാരണമായിട്ടുണ്ട്

- പി.ജെ.കുര്യൻ, ജില്ലാ പ്രസിഡന്റ് കേരള ബസ് ട്രാൻസ്പോർട്ട് അസോസിയേഷൻ