ഹരിപ്പാട് : താലൂക്ക് ആശുപത്രിയിലെ ഡോക്ടർമാരുടെയും മറ്റ് ജീവനക്കാരുടെയും ഒഴിവ് നികത്താൻ ആരോഗ്യ വകുപ്പ് തയ്യാറാകണമെന്ന് രമേശ് ചെന്നിത്തല എം.എൽ.എ ആവശ്യപ്പെട്ടു. താലൂക്ക് ആശുപത്രിയുടെയും ഹരിപ്പാട് മണ്ഡലത്തിലെ പി.എച്ച് സെന്ററുകളുടെയും പ്രവർത്തനങ്ങൾ വിലയിരുത്തുന്നതിനായി ചേർന്ന യോഗത്തിലാണ് എം.എൽ.എ ഇക്കാര്യം ആവശ്യപ്പെട്ടത്.

അത്യാഹിതം , മെഡിസിൻ വിഭാഗത്തിലേക്ക് നഗരസഭ വഴി ഒരു ഡോക്ടറേയും എൻ.എച്ച്.എം വഴി ഒരു ഡോക്ടറേയും നിയമിക്കുവാൻ യോഗം തീരുമാനിച്ചു .ഇതോടെ അത്യാഹിതവിഭാഗത്തിൽ രാത്രികാലത്ത് അനുഭവപ്പെടുന്ന തിരക്ക് കുറയ്ക്കുവാൻ കഴിയും.

ആറാട്ടുപുഴ പി.എച്ച്.സി യിലെ നിർമ്മാണ പ്രവർത്തനങ്ങൾ 3 മാസത്തിനകം തീർക്കുവാനും തൃക്കുന്നപ്പുഴ സി.എച്ച്.സി യിലെ അപ്ഗ്രഡേഷൻ ജോലികൾ 4 മാസത്തിനുള്ളിൽ തീർക്കാനും പല്ലന ഫിഷറീസ് ആശുപത്രിയിലെ നിർമ്മാണ പ്രവർത്തനങ്ങൾ ഒക്ടോബറിൽ പൂർത്തിയാക്കാനും തീരുമാനിച്ചു. മുനിസിപ്പൽ ചെയർമാൻ കെ.കെ രാമകൃഷ്ണൻ, ഡി.എം.ഒഡോ.ജമുന വർഗ്ഗീസ് , ഡോ. അനന്ത് ,ഡോ. കോശി.സി. പണിക്കർ, ഡോ. വിനീഷ് വി, ഡോ .ശ്യാം പ്രസാദ്, പ്രകാശ്.വി, വിവിധ ആരോഗ്യ സ്ഥാപനങ്ങളിലെ മെഡിക്കൽ ഓഫീസർമാർ തുടങ്ങിയവർ പങ്കെടുത്തു.

സർജറി വാർഡ് പൊളിച്ചുമാറ്റും

 താലൂക്ക് ആശുപത്രിയിൽ ലിഫ്റ്റിന്റെ നിർമ്മാണം അടിയന്തരമായി തുടങ്ങുവാൻ നിർവഹണ ഏജൻസിയ്ക്ക് നിർദ്ദേശം നൽകി

 സർജറി വാർഡ് പൊളിച്ചു നീക്കം ചെയ്യുന്നതിന് ഉദ്യോഗസ്ഥരെ കൊണ്ട് പരിശോധിപ്പിച്ച് അൺഫിറ്റ് സർട്ടിഫിക്കറ്റ് ലഭ്യമാക്കാൻ തീരുമാനിച്ചു

 താലൂക്ക് ആശുപത്രിയിൽ വിശ്രമകേന്ദ്രം ആറു മാസത്തിനുള്ളിൽ പൂർത്തിയാക്കും

 ഡയാലിസിസ് യൂണിറ്റിന്റെ നിർമ്മാണം അടിയന്തരമായി തുടങ്ങുവാൻ പി.ഡബ്ല്യൂ.ഡിക്ക് നിർദ്ദേശം നൽകി

 ട്രോമ കെയർ യൂണിറ്റിന് അനിയോജ്യമായ സ്ഥലം കണ്ടെത്തുവാനും തീരുമാനമെടുത്തു.