ആലപ്പുഴ : ശോചനീയാവസ്ഥയിലായ മുനിസിപ്പൽ ലൈബ്രറിയുടെ അറ്റകുറ്റപ്പണി നടത്താൻ തീരുമാനം. നഗരചത്വരത്തിന് സമീപമുള്ള കെട്ടിടത്തിന്റെ മുകളിലത്തെ നിലയിലുള്ള ലൈബ്രറി ചോർന്നൊലിക്കുന്ന നിലയിലായിരുന്നു. ഭിത്തികൾ വിണ്ടുകീറുകയും ചെയ്തു.
ഇവയെല്ലാം പരിഹരിക്കുന്നതിനായി 10 ലക്ഷം രൂപയാണ് നഗരസഭ വകയിരുത്തിയത്. അടുത്തയാഴ്ച ടെൻഡർ നടപടികൾ ആരംഭിക്കും. ഇത് പൂർത്തിയായാൽ വൈകാതെ നിർമ്മാണപ്രവർത്തനങ്ങൾ ആരംഭിക്കും. ഇതിന് മുന്നോടിയായി, ഇവിടെ പ്രവർത്തിച്ചിരുന്ന റീഡിംഗ് റൂം ഇരുമ്പ് പാലത്തിനു പടിഞ്ഞാറുവശമുള്ള പഴയ നഗരസഭ കെട്ടിടത്തിലേക്ക് മാറ്റി. കെട്ടിടത്തിന്റെ ശോചനീയാസ്ഥ പരിഹരിക്കുന്നതിന് കഴിഞ്ഞ രണ്ടുതവണ ടെൻഡർ നടപടികളാരംഭിച്ചെങ്കിലും കരാർ ഏറ്റെടുക്കാൻ ആരും തയ്യാറായിരുന്നില്ല. ലൈബ്രറിയുടെ ഓഫീസായി പ്രവർത്തിച്ചിരുന്ന മുറിയുടെ മേൽക്കൂര മാസങ്ങൾക്ക് മുമ്പ് ഇളകി വീണിരുന്നു. ഇതോടെ ആ മുറി പൂട്ടി ഇവിടെ ഉണ്ടായിരുന്ന പുസ്തകങ്ങൾ റീഡിംഗ് റൂമിലേക്കും അടുത്ത മുറിയിലേക്കും മാറ്റി.
ഭിത്തികൾ വീണ്ടുകീറി, ചോർച്ച
ചോർച്ചയിൽ നശിച്ച മേൽക്കൂരയിലെ ഷീറ്റുകൾ മാറ്റി സ്ഥാപിക്കും
വിണ്ടുകീറിയ ഭിത്തിയുടെ കേടുപാടുകൾ പരിഹരിക്കും
ടോയ്ലെറ്റിന്റെ അറ്റകുറ്റപ്പണികൾ നടത്തും
ലൈബ്രറിയിലെ തറ പൊളിച്ച് ബലപ്പെടുത്തും
അനുവദിച്ച തുക
₹10 ലക്ഷം
കെട്ടിടത്തിന്റെ ശോചനീയാവസ്ഥ പരിഹരിക്കുന്നതിനുള്ള നടപടികൾ നടന്നുവരികയാണ്. ടെൻഡർ പൂർത്തിയായാൽ ജോലികൾ വൈകാതെ ആരംഭിക്കും- നഗരസഭ അധികൃതർ