ആലപ്പുഴ: സപ്ലൈകോ ഓണംഫെയർ 2025 ജില്ലാതല ഉദ്ഘാടനം നാളെ വൈകുന്നേരം 5ന് മന്ത്രി പി.പ്രസാദ് നിർവഹിക്കും. പുന്നപ്ര-വയലാർ സ്മാരക ഹാളിൽ നടക്കുന്ന ചടങ്ങിൽ എച്ച് .സലാം എം.എൽ.എ അദ്ധ്യക്ഷനാകും. ഓണക്കാലത്തെ വിപണി ഇടപെടലിന്റെ ഭാഗമായി സപ്ലൈകോ എല്ലാ ജില്ലകളിലും നിയോജകമണ്ഡലങ്ങളിലും ഓണം ഫെയർ ഒരുക്കുന്നുണ്ട്. അരിയും വെളിച്ചെണ്ണയുമടങ്ങുന്ന ഭക്ഷ്യവസ്തുക്കൾ ന്യായവിലയ്ക്ക് ഉറപ്പാക്കുന്നതോടൊപ്പം ഉപഭോക്താക്കൾക്ക് വൻ വിലക്കുറവും ഓഫറുകളുമുണ്ട്. പ്രത്യേക സമ്മാന പദ്ധതികളും ഇതോടനുബന്ധിച്ച് ഒരുക്കിയിട്ടുണ്ട്. 25 മുതൽ സെപ്റ്റംബർ 4 വരെ ആലപ്പുഴ ജില്ലാകോടതി പാലത്തിന് പടിഞ്ഞാറ് വശമുള്ള പുന്നപ്ര-വയലാർ സ്മാരക ഹാളിലാണ് ഫെയർ ഒരുക്കിയിട്ടുള്ളത്. രാവിലെ 10 മുതൽ രാത്രി 8വരെയാണ് പ്രവർത്തനം. ഫെയറിനോടനുബന്ധിച്ച് വിവിധ സർക്കാർ ഏജൻസികളുടെ സ്റ്റാളുകളും പ്രവർത്തിക്കും.
ഉദ്ഘാടന പരിപാടിയിൽ കെ.സി വേണുഗോപാൽ എം.പി മുഖ്യപ്രഭാഷണം നടത്തും. പി.പി ചിത്തരഞ്ജൻ എം.എൽ.എ മുഖ്യാതിഥിയാവും. ആദ്യ വില്പന ജില്ലാ പഞ്ചായത്ത് പ്രസിഡന്റ് കെ.ജി രാജേശ്വരി നിർവഹിക്കും. നഗരസഭാധ്യക്ഷ കെ.കെ ജയമ്മ, നഗരസഭ ഉപാധ്യക്ഷൻ പി.എസ്.എം ഹുസൈൻ, സപ്ലൈകോ മേഖലാ മാനേജർ ടി.ജെ ജയദേവ്, ജില്ലാ സപ്ലൈ ഓഫീസർ കെ .മായാദേവി തുടങ്ങിയവർ പങ്കെടുക്കും.