പിറവം: മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാമത് ചരമവാർഷികത്തോടനുബന്ധിച്ച് പിറവത്ത് സംഘടിപ്പിച്ച അനുസ്മരണ സദസ് മന്ന ചാരിറ്റബിൾ ട്രസ്റ്റ് ഡയറക്ടർ ഡോ. മറിയ ഉമ്മൻ ഉദ്ഘാടനം ചെയ്തു. കക്കാട് ക്രിസ്തുരാജ പ്രെയർ സെന്റർ അഭയകേന്ദ്രത്തിൽ നടന്ന ചടങ്ങിൽ മുൻ നഗരസഭാ ചെയർമാൻ സാബു കെ. ജേക്കബ് അദ്ധ്യക്ഷനായി. മന്ന ചാരിറ്റബിൾ ട്രസ്റ്റും, അമേരിക്കൻ മലയാളി അസോസിയേഷൻ സംഘടനയായ ഫോമയും ചേർന്നാണ് ചടങ്ങ് സംഘടിപ്പിച്ചത്. റോട്ടറിയുടെ ഗിഫ്റ്റ് ഒഫ് ലൈഫ് നാഷണൽ കോഓർഡിനേറ്റർ ഡോ. എ.സി. പീറ്റർ, പാമ്പാക്കുട സർവീസ് സഹകരണ ബാങ്ക് പ്രസിഡന്റ് പ്രൊഫ. എബി.എൻ. ഏലിയാസ് എന്നിവർ അനുസ്മരണ പ്രഭാഷണം നടത്തി.

കുര്യൻ പുളിക്കൽ, പോൾ കൊമ്പനാൽ, ഏലിയാസ് വെട്ടുകുഴിയിൽ, രവി സ്രാമടത്തിൽ, ബേബിച്ചൻ തോമസ്. സെന്റർ ഡയറക്ടർ ബ്രദർ ജയ്സൺ സ്കറിയ, ആശാവർക്കറായ കോമളം ഷാജി തുടങ്ങിയവർ സംസാരിച്ചു. നിർദ്ധനർക്ക് ഭക്ഷ്യ ധാന്യ കിറ്റുകൾ വിതരണം ചെയ്തു. പ്രയർ സെന്ററിലെ അന്തേവാസികൾക്ക് സ്നേഹ വിരുന്നും നൽകി.