കൊച്ചി: വാറന്റി കാലവിനുള്ളിൽ തകരാറിലായ സോളാർ പ്ലാന്റ് നന്നാക്കാത്തതി​ന് ഉപഭോക്താവിന് 2.5 ലക്ഷം രൂപ നഷ്ടപരിഹാരം നൽകണമെന്ന് എറണാകുളം ജില്ല ഉപഭോക്തൃ തർക്ക പരിഹാര കോടതി.

2018ൽ തൃശൂരി​ലെ സൗര നാച്ചുറൽ എനർജി സൊല്യൂഷൻസി​ൽ നി​ന്ന് തേവരയിലെ വിദ്യോദയ സ്കൂൾ 13.36 ലക്ഷം രൂപ മുടക്കി​ വാങ്ങി​യ പ്ലാന്റി​ന്റെ ഇൻവെർട്ടറാണ് 2023 ഒക്ടോബർ പണി​മുടക്കി​യത്. അഞ്ച് വർഷമായി​രുന്നു വാറന്റി​. ഇൻവെർട്ടർ നന്നാക്കുകയോ മാറ്റി നൽകുകയോ ചെയ്തില്ല. പിന്നീട് ഇൻവെർട്ടർ കൊണ്ടുപോയെങ്കിലും വാറന്റി കാലഹരണപ്പെട്ടെന്ന് പറഞ്ഞ് പണം ആവശ്യപ്പെട്ടു. വാറന്റി വ്യവസ്ഥകൾ പാലിച്ചി​ല്ലെന്നും സേവനത്തിലെ ഗുരുതരമായ വീഴ്ചയാണെന്നും ഡി.ബി ബിനു അദ്ധ്യക്ഷനും വി. രാമചന്ദ്രൻ, ടി.എൻ. ശ്രീവിദ്യ എന്നിവർ അംഗങ്ങളുമായ ബെഞ്ച് വിലയിരുത്തി.

സ്കൂളിന് 2,50,000 രൂപ നഷ്ടപരിഹാരവും കോടതി ചെലവായി 5,000 രൂപയും 45 ദിവസത്തിനകം നൽകണം.