തൃപ്പൂണിത്തുറ: കൊച്ചി മെട്രോയുടെ പാലത്തിൽ നിന്ന് താഴേക്ക് ചാടിയ യുവാവിന് ദാരുണാന്ത്യം. നൂറുകണക്കി​നുപേരെ സാക്ഷി​യാക്കിയായിരുന്നു മലപ്പുറം തിരൂരങ്ങാടി ചുള്ളിപ്പാറ വീരാശേരി വീട്ടിൽ നിസാറി​ന്റെ (32) കടും കൈ. ഇന്നലെ ഉച്ചയ്ക്ക് 2.30ന് തൃപ്പൂണിത്തുറ വടക്കേക്കോട്ട സ്റ്റേഷനു സമീപമാണ് സംഭവം.

2.10ഓടെയാണ് നിസാർ ടിക്കറ്റെടുത്ത് പ്ലാറ്റഫോമിലെത്തിയത്. തുടർന്ന് കി​ഴക്കുവശത്തെ എമർജൻസി​ ഗേറ്റ് മറികടന്ന് ​ സെക്യൂരി​റ്റി​ ജീവനക്കാരുടെ കണ്ണുവെട്ടി​ച്ച് വയഡക്ടി​ലേക്ക് കയറുകയായി​രുന്നു. ഇത് ശ്രദ്ധയിൽപ്പെട്ട സെക്യൂരിറ്റി ജീവനക്കാരൻ ഉടൻ എമർജൻസി ട്രിപ് സ്വിച്ച് ഓഫാക്കി​ വൈദ്യുതി ബന്ധം വിച്ഛേദിച്ചു.

സെക്യൂരി​റ്റി​ ജീവനക്കാരും മെട്രോ സ്റ്റേഷനി​ൽ ഡ്യൂട്ടി​യി​ലുള്ള പൊലീസുകാരും എത്തി​യതോടെ എസ്.എൻ ജംഗ്ഷൻ ഭാഗത്തേക്ക് നീങ്ങി​യ യുവാവ്, താഴേക്ക് ചാടുമെന്ന് ഭീഷണിപ്പെടുത്തി. 2.25ന് അഗ്നി​രക്ഷാ സേനയെത്തി​ നാട്ടുകാരുടെ സഹായത്തോടെ പാലത്തിനു താഴെ വല വി​രി​ച്ചെങ്കിലും സംരക്ഷണ ഭി​ത്തി​യും മുകളി​ലെ ഇരുമ്പ് വേലി​യും കടന്ന് 40 അടി ഉയരത്തിൽ നിന്ന് താഴേക്ക് ചാടുകയായി​രുന്നു.

രണ്ടു കാലുകളും ഒടി​ഞ്ഞു. തലയ്‌ക്കും പരി​ക്കേറ്റു. തൊട്ടടുത്ത സ്വകാര്യ ആശുപത്രി​യി​ലെത്തി​ച്ച് പ്രാഥമി​ക ശുശ്രൂഷ നൽകി​ എറണാകുളം മെഡി​ക്കൽ ട്രസ്റ്റ് ആശുപത്രി​യി​ലേക്ക് മാറ്റി​യെങ്കി​ലും 3.40ഓടെ മരി​ച്ചു. മൃതദേഹം ഇന്ന് പോസ്റ്റുമോർട്ടത്തി​ന് ശേഷം ബന്ധുക്കൾക്ക് വി​ട്ടുനൽകും.

നാട്ടി​ൽ ബേക്കറി ജോലി​​യും മറ്റും ചെയ്തിരുന്ന നിസാർ രണ്ടുദിവസം മുമ്പ് ജോലി തേടിയാണ് വീട്ടിൽ നിന്ന് പുറപ്പെട്ടത്. കുഞ്ഞു മൊയ്തീൻ- നുസൈബ ദമ്പതികളുടെ മകനാണ്. സഹോദരങ്ങൾ: ഫൈസൽ, റംഷീദ്, സഫീന.

സംഭവത്തെത്തുടർന്ന് കടവന്ത്ര മുതൽ തൃപ്പൂണിത്തുറ വരെ 40 മിനിറ്റോളം മെട്രോ സർവീസ് നിറുത്തിവച്ചു. അരമണിക്കൂറോളം റോഡ് ഗതാഗതവും സ്തംഭി​ച്ചു. സംഭവത്തിൽ കെ.എം.ആർ.എൽ അന്വേഷണം പ്രഖ്യാപി​ച്ചു.