പറവൂർ: എസ്.എൻ.ഡി.പി യോഗം പറവൂർ യൂണിയന്റെ നേതൃത്വത്തിൽ 171-ാം ശ്രീനാരായണ ഗുരുദേവ ജയന്തി ആഘോഷം നാളെ പതാകദിനത്തോടെ തുടങ്ങും. യൂണിയന് കീഴിലെ 72 ശാഖാ യോഗങ്ങളിലും ശ്രീനാരായണ കുടുംബ യൂണിറ്റ്, എം.എഫ്.ഐ യൂണിറ്റ് തുടങ്ങി നൂറുകണക്കിന് കേന്ദ്രങ്ങളിലും എല്ലാ ഭവനങ്ങളിലും പീതപതാക ഉയർത്തും. യൂണിയൻ ഓഫീസ് അങ്കണത്തിൽ യൂണിയൻ ചെയർമാൻ സി.എൻ. രാധാകൃഷ്ണൻ പതാക ഉയർത്തും. കൺവീനർ ഷൈജു മനയ്ക്കപ്പടി, യോഗം കൗൺസിലർ ഇ.എസ്. ഷീബ, യോഗം ഡയറക്ടർമാരായ പി.എസ്. ജയരാജ്, എം.പി. ബിനു, ഡി. ബാബു, യൂണിയൻ കമ്മിറ്റി അംഗങ്ങൾ, ശാഖാ ഭാരവാഹികൾ, പോഷക സംഘടനാ ഭാരവാഹികൾ തുടങ്ങിയവർ പങ്കെടുക്കും.

ഗുരുദേവകൃതികളെ ആസ്പദമാക്കിയുള്ള കലാസാഹിത്യ മത്സരങ്ങൾ ശാഖാതലത്തിൽ 10നും മേഖലാതലത്തിൽ 17നും യൂണിയൻ തലത്തിൽ 23, 24തീയതികളിലും നടക്കും.

ശ്രീനാരായണ ദിവ്യജ്യോതി പര്യടന ഉദ്ഘാടനം 28ന് വൈകിട്ട് 5ന് യൂണിയൻ ഹാളിൽ നടക്കും. പര്യടനത്തിനുള്ള ദിവ്യജ്യോതി അന്ന് ഉച്ചയ്ക്ക് രണ്ടിന് ആലുവ അദ്വൈതാശ്രമത്തിലെ കെടാവിളക്കിൽ നിന്ന് സ്വാമി ധർമ്മചൈതന്യ ജ്വലിപ്പിച്ച് യൂണിയൻ ചെയർമാൻ സി.എൻ. രാധാകൃഷ്ണന് കൈമാറും. യൂണിയൻ ഭാരവാഹികൾ ഏറ്റുവാങ്ങും. തുടർന്ന് യൂത്ത് മൂവ്മെന്റ് ഭാരവാഹികളുടെ നേതൃത്വത്തിൽ നിരവധി വാഹനങ്ങളുടെ അകമ്പടിയിൽ യൂണിയൻ ആസ്ഥാനത്ത് എത്തിക്കും. 29, 30, 31 സെപ്റ്റംബർ 1, 2 തീയതികളിൽ യൂണിയന് കീഴിലുള്ള ശാഖായോഗങ്ങളിൽ ദിവ്യജ്യോതി പര്യടനം നടക്കും. ശ്രീനാരായണ ജയന്തിദിനമായ സെപ്തംബർ 7ന് പറവൂർ നഗരത്തിൽ ജയന്തിദിന ഘോഷയാത്രയും തുടർന്ന് ശ്രീനാരായണ ജയന്തി ആഘോഷ സമാപന സമ്മേളനവും നടക്കും.