പറവൂർ: പറവൂർ കോടതിയിൽ ഇ മെയി​ലി​ൽ വന്ന ബോംബ് ഭീഷണി​യെത്തുടർന്ന് നാല് മണിക്കൂറോളം കോടതി നടപടികൾ തടസപ്പെട്ടു. പറവൂർ പ്രിൻസിപ്പൽ സബ് കോടതി ജഡ്ജിയുടെ ഇ മെയിലാണ് ബോംബ് ഭീഷണി വന്നത്. രാവിലെ 11ന് കോടതി നടപടികൾ തുടങ്ങി അല്പസമയം കഴിഞ്ഞാണ് ജീവനക്കാർ ഈ മെയിൽ കണ്ടത്. ഇന്നലെ പുലർച്ചെ രണ്ടരയോടെ വന്നിട്ടുള്ള മെയിലിൽ സബ് കോടതി ചേംബറിൽ ബോംബ് വച്ചിട്ടുണ്ടെന്നും ഉച്ചയ്ക്ക് ഒരുമണിക്കും ഒന്നേമുക്കാലിനും ഇടയിൽ പൊട്ടിത്തെറിയുണ്ടാകുമെന്നും ജീവനക്കാരെ ഇതിനുമുമ്പ് മാറ്റണമെന്നുമുണ്ടായി​രുന്നു. മെയിൽ ലഭിച്ച വിവരം ഉടനെ ജീവനക്കാർ ചേംബറിലെത്തി ജഡ്ജിയേയും പറവൂർ പൊലീസിനെയും വിവരം അറിയിച്ചു. പൊലീസെത്തി കച്ചേരി മൈതനായിലെ എല്ലാ കോടതികളി​ൽനിന്നും ജീവനക്കാരെയും അഭിഭാഷകരെയും ഒഴിപ്പിച്ചു. ബോംബ് സ്ക്വാഡ് കെട്ടിടങ്ങളിലും കച്ചേരിമൈതാനത്തും പരിശോധന നടത്തിയെങ്കിലും അസ്വഭാവികമായൊന്നും കണ്ടെത്താനായില്ല. റൂറൽ എസ്.പി എം. ഹേമലത കോടതിയിലെത്തി ജഡ്ജിമാരും അഭിഭാഷകരുമായി സംസാരിച്ച് സുരക്ഷ ഉറപ്പാക്കിയശേഷം മൂന്നുമണിയോടെ കോടതി നടപടികൾ തുടങ്ങി.

* പരി​ഭ്രാന്തി​ പരത്തി​ രക്തപ്പാടുകൾ

ബോംബ് ഭീഷണിക്കിടെ കോടതിയിൽ രക്ത‌പ്പാടുകൾ കണ്ടെത്തിയത് പരിഭ്രാന്തി സൃഷ്ടിച്ചു. ബോംബ് സ്ക്വാഡ് പരിശോധന നടത്തുന്നതിനിടെയാണ് കോടതി വരാന്തയിൽ രക്ത‌പ്പാടുകൾ കണ്ടത്. മുൻസി​ഫ് കോടതിയുടെ വരാന്തയ്ക്ക് ചുറ്റും സബ് കോടതിക്ക് സമീപത്തെ കെട്ടിടത്തിന്റെ ചവിട്ടുപടിയിലുമാണ് രക്തപ്പാടുകൾ കണ്ടത്. ഫോറൻസിക് വിഭാഗം രക്തസാമ്പിളുകൾ ശേഖരിച്ചു. ഇതു മനുഷ്യരക്തമാണോ മൃഗത്തിന്റേതാണോ എന്നു വ്യക്തമല്ല. മുറിവേറ്റ നായയുടേതോ മരപ്പട്ടിയുടേതോ കാൽ പതിഞ്ഞതുപോലുള്ള പാടുകളാണെന്നാണ് പൊലീസിന്റെ പ്രാഥമി​ക നിഗമനം. ശാസ്ത്രീയ പരിശോധന നടത്തും.

*ഇംഗ്ളീഷി​ലുള്ള സന്ദേശം

bhagawanthmann@yandex.com എന്ന മെയിൽ ഐഡിയിൽനിന്ന് വന്ന സന്ദേശത്തിൽ 'മദ്രാസ് ടൈഗേഴ്സ‌്" എന്നൊരു വാക്ക് രേഖപ്പെടുത്തിയിട്ടുണ്ടെന്ന് പൊലീസ് പറഞ്ഞു. ഇംഗ്ളീഷിലുള്ള ദീർഘമായ മെയിലിൽ തമിഴ്നാട്ടിലെ ചില സംഭവങ്ങൾ പരസ്പര ബന്ധമില്ലാതെ പറയുന്നുണ്ട്. ഇ-മെയിൽ വന്നത് ഓപ്പൺ സോഴ്സ് ഇന്റർനെറ്റ് വഴിയല്ലെന്നും ഡാർക് വെബ് വഴിയാണെന്നുമാണ് പൊലീസിന്റെ നിഗമനം. പറവൂർ പൊലീസ് കേസെടുത്ത് അന്വേഷണം തുടങ്ങി​.