തൃപ്പൂണിത്തുറ: ഭക്ഷണവുമായി​ അപ്പാർട്ടുമെന്റി​ലെത്തി​യ പിതാവിനെ കത്തിക്ക് കുത്തിയ കേസി​ൽ മകനെ പൊലീസ് അറസ്റ്റുചെയ്തു. പള്ളിപ്പറമ്പ്കാവ് എം.കെ.കെ നായർ നഗർ ജേക്കബ്സ് എൻക്ലേവിൽ കിഴവനവീട്ടിൽ ഡിക്സൻ ആന്റണിയാണ് (51) അറസ്റ്റി​ലായത്. പിതാവ് ആന്റണിക്കാണ് (86) കുത്തേറ്റത്. അപ്പാർട്ടുമെന്റി​ൽ ഡിക്സന്റെ താമസസ്ഥലത്തുവച്ച് ബുധനാഴ്ച രാവിലെ 9.10ഓടെയായിരുന്നു സംഭവം.

ആന്റണി​യുടെ കരച്ചിൽ കേട്ടെത്തിയ തൊട്ടടുത്തെ താമസക്കാർ

അറിയിച്ചതനുസരിച്ച് മറ്റുള്ളവരും എത്തി​യെങ്കിലും ഡിക്സൻ കത്തി​യുമായി​ നി​ൽക്കുകയായി​രുന്നു. പൊലീസ് അറിയിച്ചതനുസരിച്ചെത്തിയ ആംബുലൻസ് ഡ്രൈവറെയും ഡിക്സൺ ആക്രമിക്കാൻ ശ്രമിച്ചു. തൊട്ടുപിന്നാലെയെത്തിയ പൊലീസ് ഡിക്സനെ കസ്റ്റഡിയിലെടുക്കുകയായിരുന്നു.

പരി​ക്കേറ്റ ആന്റണി​യെ ആദ്യം തൃപ്പൂണി​ത്തുറ താലൂക്കാശുപത്രിയിലെത്തി​ച്ചു. തുടർന്ന് ജനറൽ ആശുപത്രിയിലേയ്ക്ക് മാറ്റി. തൃപ്പൂണിത്തുറ മിനി സിവിൽ സ്റ്റേഷനിൽ എത്തുന്നവർക്ക് അപേക്ഷകൾ എഴുതിക്കൊടുക്കുന്ന ജോലിയാണ് ആന്റണി​ക്ക്. ഡിക്സൻ സ്ഥിരം മദ്യപാനിയാണെന്ന് നാട്ടുകാർ പറയുന്നു. പ്രകോപനത്തി​ന് കാരണമെന്തെന്ന് വ്യക്തമല്ല.