മൂവാറ്റുപുഴ: എം.സി റോഡിൽ മൂവാറ്റുപുഴ വെള്ളൂർകുന്നം സിഗ്നൽ ജംഗ്ഷന് സമീപം നിറുത്തിയിട്ടിരുന്ന തടിലോറിക്ക് പിന്നിൽ ബൈക്കിടിച്ച് യുവാവ് മരിച്ചു. കോട്ടയം സൗത്ത് പാമ്പാടി ആലുങ്കൽപറമ്പിൽ ചന്ദ്രൻ ചെട്ടിയാരുടെയും ശോഭയുടെയും മകൻ അനന്തു ചന്ദ്രനാണ് (30) മരിച്ചത്. സ്വകാര്യ ധനകാര്യ സ്ഥാപനത്തിൽ മാനേജരാണ്.

ടയർ പഞ്ചറായതിനെത്തുടർന്ന് ബുധനാഴ്ച പുലർച്ചെ ഒരുമണിയോടെ തടി ലോറി ഇവിടെ നിറുത്തിയിട്ടിരിക്കുകയായിരുന്നു. ഇന്നലെ പുലർച്ചെ 5.15 ഓടെ ലോറിയുടെ ഡ്രൈവറാണ് അപകടം നടന്നത് അറിയുന്നത്. സ്ഥലത്തെത്തിയ പേഴക്കാപ്പിള്ളി സ്വദേശി ഷൗക്കത്തും മറ്റൊരു വാഹനത്തിലെത്തിയ യുവാക്കളും ചേർന്ന് മൂവാറ്റുപുഴ എം.സി.എസ് ആശുപത്രിയിലെത്തിച്ചെങ്കിലും രക്ഷിക്കാനായില്ല. സഹോദരി: ആര്യ (യു.കെ).