കളമശേരി: വയോജനങ്ങളുടെ അറിവും അനുഭവവും ഉപയോഗിച്ച് സമൂഹത്തിന് ഗുണങ്ങളുണ്ടാക്കാനാകുമെന്ന ആശയമാണ് കൃഷിക്കൊപ്പം കളമശേരി എന്ന പദ്ധതിയിലൂടെ മന്ത്രി പി. രാജീവ് മുന്നോട്ടുവയ്ക്കുന്നതെന്ന് മുൻ മന്ത്രി ഡോ.ടി എം തോമസ് ഐസക് പറഞ്ഞു. കാർഷികോത്സവ നഗറിൽ വയോജനസംഗമം ഉദ്ഘാടനം ചെയ്യുകയായിരുന്നു അദ്ദേഹം.

വ്യവസായ മന്ത്രി പി. രാജീവ് അദ്ധ്യക്ഷനായി. കളമശേരി നിയോജക മണ്ഡലത്തെ വയോജന സൗഹൃദമാക്കാൻ വയോജനങ്ങൾക്കൊപ്പം പരിപാടി നടപ്പാക്കും. വയോജനങ്ങളുടെ ഓർമ്മക്കുറിപ്പുകൾ ശേഖരിച്ച് കളമശേരി ഓർമ്മകളിലൂടെ പുസ്തകമിറക്കുമെന്നും മന്ത്രി പറഞ്ഞു.

മുൻ എം.എൽ.എ. എ.എം. യൂസഫ്, സംഘാടകസമിതി ചെയർമാൻ വി.എം, ശശി, ജനറൽ കൺവീനർ എം.പി. വിജയൻ, എം.എസ്. നാസർ തുടങ്ങിയവർ സംസാരിച്ചു.