കട്ടപ്പന: പുതിയ ബസ് സ്റ്റാൻഡിൽ സ്വകാര്യ വാഹനങ്ങൾ അനിയന്ത്രിതമായി കയറിയിറങ്ങുന്നത് അപകടങ്ങൾക്ക് കാരണമാകുന്നു. തെറ്റായ ദിശകളിലൂടെയാണ് പലപ്പോഴും വാഹനങ്ങൾ സ്റ്റാൻഡിലൂടെ തലങ്ങുംവിലങ്ങും പായുന്നത്. അലക്ഷ്യമായി പാർക്ക് ചെയ്യുന്നതും കയറിയിറങ്ങുന്നതും അപകടങ്ങളുണ്ടാക്കുന്നു. കെ.എസ്.ആർ.ടി.സി ബസുകൾ പാർക്ക് ചെയ്യുന്ന ട്രാക്കിന്റെ പിൻവശങ്ങളിലാണ് അനധികൃത പാർക്കിങ് ഏറെ. ബസുകൾ സ്റ്റാൻഡിൽ പ്രവേശിക്കുന്നതിനും പുറപ്പെടുന്നതിനും തടസമുണ്ടാക്കുന്നു. ഇത് ഗതാഗതക്കുരുക്കിനും കാരണമാകുന്നു. വിദ്യാർത്ഥികൾ ഉൾപ്പെടെയുള്ള യാത്രക്കാർ ഭീതിയോടെയാണ് കടന്നുപോകുന്നത്. അനധികൃത പാർക്കിങ് ഒഴിവാക്കാൻ നടപടി സ്വീകരിക്കണമെന്ന് ബി.ഡി.ജെ.സ് ഇടുക്കി നിയോജകമണ്ഡലം പ്രസിഡന്റ് പ്രസാദ് വിലങ്ങുപാറ പറഞ്ഞു.