ഇടുക്കി: വിവിധ മേഖലകളിൽ കഴിവ് പ്രകടിപ്പിച്ച ജില്ലയിൽ നിന്നുമുള്ള കുട്ടികൾക്ക് ഉജ്ജ്വലബാല്യം പുരസ്‌കാരത്തിന് അപേക്ഷിക്കാം. 2024 ജനുവരി 1 മുതൽ ഡിസംബർവരെയുള്ള കാലയളവിൽ കലാ, കായികം, സാഹിത്യം, ശാസ്ത്രം, സാമൂഹികം, പരിസ്ഥിതി സംരക്ഷണം, ഐ.ടി മേഖല, കൃഷി, മാലിന്യസംസ്‌കരണം, ജീവകാരുണ്യ പ്രവർത്തനം, ക്രാഫ്റ്റ്, ശിൽപനിർമ്മാണം, അസാമാന്യ ധൈര്യത്തിലൂടെ നടത്തിയ പ്രവർത്തനം എന്നീ മേഖലകളിൽ കഴിവ് പ്രകടിപ്പിച്ചിട്ടുള്ള 6നും 18 നും ഇടയിൽ പ്രായമുള്ള കുട്ടികളാണ് പുരസ്‌കാരത്തിനായി അപേക്ഷ നൽകേണ്ടത്. ഇതുമായി ബന്ധപ്പെട്ട് ലഭിച്ചിട്ടുള്ള സർട്ടിഫിക്കറ്റുകൾ, പ്രശസ്തി പത്രങ്ങൾ, കുട്ടിയുടെ പേരിൽ പ്രസിദ്ധീകരിച്ചിട്ടുള്ള പുസ്തകമുണ്ടെങ്കിൽ ആയതിന്റെ പകർപ്പ്, കലാ പ്രകടനങ്ങൾ ഉൾക്കൊള്ളുന്ന സിഡി/ പെൻഡ്രൈവ്, പത്രക്കുറിപ്പുകൾ എന്നിവയുടെ പകർപ്പുകൾ അപേക്ഷയോടൊപ്പം സമർപ്പിക്കണം. കേന്ദ്രസർക്കാരിന്റെ എൻ.സി.എ.ഇ.എ കരസ്ഥമാക്കിയ കുട്ടികളെയും ഒരു തവണ ഉജ്ജ്വലബാല്യം പുരസ്‌കാരം ലഭിച്ച കുട്ടികളേയും പരിഗണിക്കുന്നതല്ല. ഒരു ജില്ലയിൽ നിന്ന് നാല് കുട്ടികൾക്കാണ് അവാർഡ് നൽകുന്നത്. 25000 രൂപയും സർട്ടിഫിക്കറ്റും ട്രോഫിയുമടങ്ങുന്നതാണ് പുരസ്‌കാരം. കുട്ടികളെ 6,​11 വയസ്സ്, 12,​18 വയസ്സ് എന്നീ രണ്ട് വിഭാഗങ്ങളായി തിരിച്ച് ഓരോ വിഭാഗത്തിനും ഓരോ കുട്ടിക്കാണ് അവാർഡ് നൽകുന്നത്. ഭിന്നശേഷിക്കാരായ കുട്ടികളെ പ്രത്യേക കാറ്റഗറിയിൽ പരിഗണിച്ച് അവാർഡ് നൽകും. അപേക്ഷ ജില്ലാ ശിശു സംരക്ഷണ ഓഫീസർ, ജില്ലാ ശിശു സംരക്ഷണയൂണിറ്റ്, പൈനാവ് പി.ഒ, പൈനാവ് , ഇടുക്കി, പിൻ 685603 എന്ന വിലാസത്തിൽ 30നകം ലഭിക്കത്തക്ക വിധം അയക്കണം. കൂടുതൽ വിവരങ്ങൾക്ക് ഓഫീസിലോ 7510365192, 6282406053 എന്നീ നമ്പരുകളിൽ ബന്ധപ്പെടാം. സമയപരിധിയും മാനദണ്ഡവും കൃത്യമായി പാലിക്കണം. വിശദ വിവരങ്ങൾ www.wcd.kerala.gov.in എന്ന വെബ്‌സൈറ്റിൽ ലഭിക്കും.