ഇടുക്കി: പഴയരിക്കണ്ടം ഗവ. ഹൈസ്‌കൂളിൽ പുതിയ ബാന്റ് ട്രൂപ്പ് ആരംഭിച്ചു. അരങ്ങേറ്റവും വിവിധ പദ്ധതികളുടെ ഉദ്ഘാടനവും ജില്ലാ പഞ്ചായത്ത് പ്രസിഡന്റ് രാരിച്ചൻ നീറണാംകുന്നേൽ നിർവഹിച്ചു.ദീർഘകാലത്തെ സ്വപ്നസാക്ഷാത്കാരമാണ് വിദ്യാർഥികളുടെയും അദ്ധ്യാപകരുടെയും രക്ഷകർത്താക്കളുടെയും കൂട്ടായ പരിശ്രമത്തിലൂടെ നിറവേറിയതെന്നും ഈ കൂട്ടായ്മയിലൂടെ കലാകായിക മേഖലയിലും നിരവധി നേട്ടങ്ങൾ സ്‌കൂളിന് നേടാൻ കഴിഞ്ഞിട്ടുണ്ടെന്നും അദ്ദേഹം പറഞ്ഞു.
ജില്ലാ പഞ്ചായത്ത് മെമ്പർ ഷൈനി റെജി 9 ലക്ഷം രൂപ അനുവദിച്ച് പൂർത്തീകരിച്ച പദ്ധതികളുടെയും ഗ്രാമപഞ്ചായത്ത് വൈസ് പ്രസിഡന്റ് രാജേശ്വരി രാജനും പഞ്ചായത്ത് ഭരണസമിതിയും ചേർന്ന് 12 ലക്ഷം രൂപ അനുവദിച്ച് നിർമ്മാണം പൂർത്തീകരിച്ച കുടിവെള്ള ടാങ്കിന്റെയും ഐ.ടി ലാബിന്റെയും ഉദ്ഘാടനവും നടത്തി. സ്‌കൂൾ പി.ടി.എ പ്രസിഡന്റ് ജയൻ അദ്ധ്യക്ഷത വഹിച്ചു.
ചെണ്ടമേളം, മ്യൂസിക്, ഡ്രോയിംഗ്, നൃത്തം, യോഗ, കരാട്ടെ, ക്രാഫ്റ്റ്, സൂംബാ ഡാൻസ് തുടങ്ങിയ വിവിധ ഇനങ്ങളിൽ രക്ഷകർത്താക്കളുടെയും അദ്ധ്യാപകരുടെയും സഹകരണത്തോടെയും പിന്തുണയോടെയും പി.ടി.എ കഴിഞ്ഞ മൂന്ന് വർഷക്കാലമായി ആവിഷ്‌കരിച്ച് നടപ്പിലാക്കി വരുന്ന വിവിധ കലാകായിക പരിശീലന പദ്ധതികളുടെ ഭാഗമായാണ് ബാന്റ് മേള പരിശീലനവും നടപ്പിലാക്കിയത്.പരിപാടിയിൽ ജില്ലാ പഞ്ചായത്ത് അംഗം ഷൈനി റെജി, ഗ്രാമ പഞ്ചായത്ത് വൈസ് പ്രസിഡന്റ് രാജേശ്വരി രാജൻ, ഇടുക്കി ബ്ലോക്ക് പഞ്ചായത്ത് സ്റ്റാന്റിംഗ് കമ്മറ്റി ചെയർപേഴ്‌സൺ ഉഷ മോഹനൻ, പൊതുവിദ്യാഭ്യാസ ഉപഡയറക്ടർ ഗീത പി.സി, സ്‌കൂൾ അദ്ധ്യാപകരും വിദ്യാർത്ഥികളും പങ്കെടുത്തു.