കട്ടപ്പന: കൊച്ചുതോവാളയിൽ ഉണ്ടായ മാഫിയയുടെ ഗുണ്ടാഅക്രമണത്തിൽ പ്രതിഷേധിച്ച് കൊച്ചുതോവാള പൗരസമിതി യോഗം ചേർന്നു. ഇത്തരം പ്രവർത്തനങ്ങൾ മേഖലയിൽ ഉണ്ടാകാതിരിക്കാനുള്ള നടപടിക്രമങ്ങൾക്കുവേണ്ടിയാണ് യോഗം ചേർന്നത്. യോഗത്തിൽ ഫാ. ഇമ്മാനുവൽ മടുക്കക്കുഴി, എസ്എൻഡിപി യോഗം ശാഖാ സെക്രട്ടറി അഖിൽ കൃഷ്ണൻകുട്ടി എന്നിവർ രക്ഷാധികാരികളും കട്ടപ്പന നഗരസഭ ചെയർപേഴ്‌സൺ ബീനാ ടോമി കൺവീനറുമായുള്ള 11 കമ്മിറ്റിയെയും തെരഞ്ഞെടുത്തു. കഴിഞ്ഞദിവസം ലഹരി മാഫിയയുടെ ഗുണ്ടാവിളയാട്ടത്തിൽ പ്രദേശത്തെ നിരവധി പേർക്കാണ് പരിക്കേറ്റത്. പ്രദേശത്തെ വീടുകളിൽ കയറിയും റോഡുകളിൽ നിന്നവരെയും അടക്കം യാതൊരു കാരണവും കൂടാതെ ഇവർ ആക്രമിക്കുകയായിരുന്നു. പ്രദേശത്തെ നിരവധി ആളുകൾ ഒപ്പിട്ട പരാതി കലക്ടർ , ജില്ലാ പൊലീസ് മേധാവി, കട്ടപ്പന ഡിവൈ.എസ്പി, എക്‌സൈസ് എന്നിവർക്ക് കൈമാറി. കൂടാതെ 12ന് വൈകിട്ട് 5ന് കൊച്ചുതോവളയിൽ പ്രതിഷേധ പ്രകടനവും യോഗം നടത്തുന്നതിനും തീരുമാനിച്ചു.. കൂടാതെ ലഹരി ഉപയോഗിച്ച് ഇത്തരം പ്രവർത്തനങ്ങൾ നടത്തുന്നവരെ കണ്ടെത്തി ഡീ അഡിക്ഷൻ സെന്റററിൽ ആക്കുന്നതിനും യോഗം തീരുമാനിച്ചു. കട്ടപ്പന നഗരസഭ ചെയർപേഴ്‌സൺ ബീനാ ടോമി അദ്ധ്യക്ഷയായി. സിബി പാറപ്പായി, സിജു ചാക്കുംമൂട്ടിൽ, ഫാദർ ഇമ്മാനുവൽ മടുക്കക്കുഴി, അഖിൽ കൃഷ്ണൻകുട്ടി, അഡ്വ. സുജിത്ത് പ്രസാദ്, ബിനോയി വെണ്ണിക്കുളം, ജിതിൻ ജോയി, ടോമി പാച്ചോലിൽ, സിഡിഎസ് അംഗം സോണിയ തോമസ്, എ ഡിഎസ് പ്രസിഡന്റ് മേരിക്കുട്ടി പള്ളിവാതുക്കൽ എന്നിവർ സംസാരിച്ചു.