കട്ടപ്പന: അയ്യപ്പൻകോവിൽ മാട്ടുക്കട്ട - ശാസ്താംകണ്ടം റോഡ് തകർന്നതോടെ നാട്ടുകാർക്ക് യാത്രാദുരിതം. മഴക്കാലത്ത് ദുർഘട പാതയിലൂടെ ഏറെ ബുദ്ധിമുട്ടിയാണ് യാത്ര. വെള്ളക്കെട്ടും ചെളിയും നിറഞ്ഞ പാതയിൽ കാൽനടയാത്ര പോലും ദുഷ്‌കരമാണ്. സഞ്ചാരയോഗ്യമാക്കാതെ പഞ്ചായത്ത് അവഗണിക്കുന്നതായും നാട്ടുകാർ ആരോപിച്ചു. മാട്ടുക്കട്ട വട്ടോടിപടി - ശാസ്താംകണ്ടം അയ്യപ്പൻകോവിൽ റോഡ് കുടിയേറ്റ കാലത്തോളം പഴക്കമുള്ളതാണ്. ഒന്നര കിലോമീറ്റർ ദൈർഘ്യമുള്ള മൺപാതയിൽ മഴക്കാലത്ത് ചെളിയും വെള്ളക്കെട്ടുകളും നിറയുന്നു. ഓടകൾ സമീപവാസികൾ അടച്ചതോടെ മഴവെള്ളം കെട്ടിനിൽക്കുന്ന സ്ഥിതിയായി. റോഡിന്റെ ശോച്യാവസ്ഥയെ തുടർന്ന് ഓട്ടോ - ടാക്സി വാഹനങ്ങൾ ഓട്ടംവിളിച്ചാൽ പോലും വരില്ലെന്ന് നാട്ടുകാർ പറയുന്നു. റോഡിലെ കുഴികൾ നാട്ടുകാർ ചേർന്നാണ് താൽകാലികമായി അടച്ച് ഇരുവശങ്ങളിലെയും കുറ്റിക്കാടുകൾ വെട്ടിത്തെളിക്കുകയും ചെയ്തത്.