ഇടുക്കി: കർഷക ദിനത്തിൽ ഗ്രാമ പഞ്ചായത്തുകളുടെയും കൃഷി ഭവനുകളുടെയും സംയുക്താഭിമുഖ്യത്തിൽ ജില്ലയിൽ വിപുലമായ കർഷക ദിനാചരണം സംഘടിപ്പിച്ചു. പഞ്ചായത്തുകളിൽ വിവിധ കാർഷിക മേഖലകളിലെ മികച്ച കർഷകരെ ആദരിച്ചു. മികച്ച മുതിർന്ന കർഷകൻ, ജൈവകർഷകർ, സമ്മിശ്രകർഷകർ, തേനീച്ച കർഷകർ, കുട്ടികർഷകർ, ക്ഷിരകർഷകർ, വനിതാ കർഷക, നെൽകർഷകൻ തുടങ്ങി വിവിധ മേഖലകളിൽ മികവ് തെളിയിച്ചവർക്ക് ചടങ്ങുകളിൽ ആദരവും പുരസ്‌കാരങ്ങളും നൽകി. കർഷകർക്കായി കാർഷിക പരിശീലന ക്ലാസുകളും സെമിനാറുകളും സംഘടിപ്പിച്ചു. കാർഷിക ക്വിസ് മത്സരം തുടങ്ങിയ വിവിധ പരിപാടികളും നടത്തി. പരിപാടിയിൽ പങ്കെടുത്ത മുഴുവൻ കർഷകർക്കും പച്ചക്കറി വിത്തുകളും തൈകളും വിതരണം ചെയ്തു. നിരവധി കർഷകർ പഞ്ചായത്ത് തല യോഗങ്ങളിൽ പങ്കെടുത്തു. ശാന്തമ്പാറ ഗ്രാമപഞ്ചായത്തിൽ നടത്തിയ കർഷക ദിനാചരണം എം.എം. മണി എം.എൽ.എ ഉദ്ഘാടനം ചെയ്തു. ദേവികുളം ബ്ലോക്ക് പഞ്ചായത്ത് പ്രസിഡന്റ് ജിഷ ദിലീപ് കർഷക ദിന സന്ദേശം നൽകി. ശാന്തമ്പാറ പഞ്ചായത്ത് പ്രസിഡന്റ് ലിജു വർഗീസ് അദ്ധ്യക്ഷനായി. ദേവികുളം കൃഷി അസിസ്റ്റന്റ് ഡയറക്ടർ ജെ. ജയന്തി പദ്ധതി വിശദീകരിച്ചു. പഞ്ചായത്ത് വൈസ് പ്രസിഡന്റ് നിത്യ സെലിൻ, കൃഷി ഓഫിസർ കെ.എൻ. ബിനിത, ആസൂത്രണ സമിതി ഉപാദ്ധ്യക്ഷൻ സേനാപതി ശശി തുടങ്ങിയവർ പങ്കെടുത്തു. വാത്തിക്കുടി പഞ്ചായത്തിൽ സംഘടിപ്പിച്ച കർഷക ദിനാചരണം പഞ്ചായത്ത് പ്രസിഡന്റ് ജോസ്മി ജോർജ് ഉദ്ഘാടനം ചെയ്തു. മുരിക്കാശേരി സഹകരണ ബാങ്ക് ഓഡിറ്റോറിയത്തിൽ സംഘടിപ്പിച്ച യോഗത്തിൽ വൈസ് പ്രസിഡന്റ് പ്രദീപ് ജോർജ് അദ്ധ്യക്ഷത വഹിച്ചു. ഇടുക്കി ബ്ലോക്ക് പഞ്ചായത്ത് പ്രസിഡന്റ് എബി തോമസ് കർഷക ദിന സന്ദേശം നൽകി.