കട്ടപ്പന: ഉപ്പുതറ- കൂലേറ്റം കോട്ടമല റോഡിൽ വെള്ളക്കെട്ട് രൂക്ഷം. റോഡിന്റെ ഒരു കിലോമീറ്ററോളം ഭാഗത്താണ് ടാറിങ് ഇളകി വലിയ ഗർത്തങ്ങൾ രൂപപ്പെട്ടിരിക്കുന്നത്. രാത്രി ഇതുവഴിയെത്തുന്ന ടൂവീലർ ഉൾപ്പെടെയുള്ള വാഹനങ്ങൾ അപകടത്തിൽപ്പെടുന്നതും പതിവാണ്. മഴക്കാലമായതോടെ ഗർത്തങ്ങളിൽ വെള്ളം കെട്ടിനിന്ന് കാൽനട യാത്ര പോലും ദുഷ്‌കരമായിരിക്കുകയാണ്. സ്‌കൂൾ കുട്ടികളും നിരവധി വിനോദസഞ്ചാരികളും കടന്നുപോകുന്ന പാതയാണ് മാസങ്ങളായി തകർന്നു കിടക്കുന്നത്. വാഗമണ്ണിൽ നിന്നെത്തുന്ന നൂറുകണക്കിന് ഓഫ് റോഡ് ജീപ്പുകളും ഇതുവഴിയാണ് കടന്നു പോകുന്നത്. റോഡിന്റെ അറ്റകുറ്റപ്പണികൾ നടത്തുന്നതിന് അധികൃതർ ഇതുവരെ തയ്യാറായിട്ടില്ലെന്ന ആരോപണവും ശക്തമാണ്. അടിയന്തരമായി റോഡിന്റെ അറ്റകുറ്റപ്പണി നടത്തി ഗതാഗതയോഗ്യമാക്കണമെന്നുള്ള ആവശ്യമാണ് നാട്ടുകാർക്കുള്ളത്.