കട്ടപ്പന : ഇടശേരി ജംങ്ഷനിൽ നഗരസഭ നിർമിക്കുന്ന കമാനത്തിന്റെ നിർമാണ പ്രവർത്തനങ്ങൾ തടഞ്ഞ് സി.പി.ഐ. അപകടസാധ്യത ഉയർത്തിയുള്ള നിർമാണ പ്രവർത്തനങ്ങളെ സംബന്ധിച്ച് വൈദ്യുതി വകുപ്പ് ഉന്നത അധികാരികൾക്ക് സി.പി.ഐ സൗത്ത് ലോക്കൽ സെക്രട്ടറി ഗിരീഷ് മാലിയിൽ പരാതി നൽകിയിരുന്നു. അപകട സാധ്യതയുമായി ബന്ധപ്പെട്ട് പരാതി നൽകിയ സാഹചര്യത്തിൽ അതിന്റെ അന്വേഷണം നടക്കുന്നതിനുമുമ്പേ നിർമാണം പൂർത്തിയാക്കാനാണ് നഗരസഭ ശ്രമിക്കുന്നതെന്ന് പ്രവർത്തകർ ആരോപിച്ചു. ട്രാൻസ്‌ഫോർമറുകളുടെ സമീപത്തായിട്ട് വൈദ്യുതി ബന്ധം വിച്ഛേദിക്കാതെയാണ് കമാനം നിർമിക്കുന്നത്. നിർമാണ വേളയിലും അല്ലാത്തപ്പോഴും ഇത് വലിയ അപകടം ക്ഷണിച്ചു വരുത്തുമെന്നും പ്രവർത്തകർ പറഞ്ഞു. പ്രതിഷേധത്തെ തുടർന്ന് നിർമാണം നിർത്തിവെച്ചു. നിർമാണം തടഞ്ഞതോടെ നഗരസഭ അധികൃതർ സ്ഥലത്തെത്തുകയും തർക്കം ഉണ്ടാകുകയും ചെയ്തു.