കട്ടപ്പന: നഗരസഭയുടെ നേതൃത്വത്തിൽ പുതിയ ബസ് സ്റ്റാൻഡിന്റെ പ്രവേശന കവാടമായ ഇടശേരി ജംഗ്ഷനിൽ സ്ഥാപിച്ചിരിക്കുന്ന കമാനം സുരക്ഷിതമല്ലെന്ന് കാണിച്ച് വൈദ്യുതി വകുപ്പ് നഗരസഭയ്ക്ക് കത്ത് നൽകി. കാൽനട യാത്രക്കാർ ഉൾപ്പെടെയുള്ള പൊതുജനങ്ങൾക്കും വൈദ്യുതി വകുപ്പ് ജീവനക്കാരുടെ സുരക്ഷയ്ക്കും ജീവഹാനിക്കും മറ്റ് നാശനഷ്ടങ്ങൾക്കും കാരണമായേക്കാവുന്ന കമാനം സുരക്ഷിതമാക്കാനായി ആവശ്യമായ മാറ്റം വരുത്തണമെന്ന് ആവശ്യപ്പെട്ടാണ് കട്ടപ്പന ഇലക്ട്രിക്കൽ സബ് ഡിവിഷൻ അസിസ്റ്റന്റ് എക്സിക്യൂട്ടീവ് എൻജിനീയർ നഗരസഭാ സെക്രട്ടറിക്ക് നോട്ടീസ് നൽകിയത്. രണ്ട് ട്രാൻസ്‌ഫോമറുകളോട് ചേർന്ന് വൈദ്യുതി ലൈനുകൾക്കു സമീപത്തായി നിർമിച്ചിരിക്കുന്ന കമാനം സുരക്ഷിതമല്ല. സെൻട്രൽ ഇലക്ട്രിസിറ്റി അതോറിട്ടിയുടെ സുരക്ഷാ മാനദണ്ഡങ്ങൾ പാലിക്കാതെയാണ് കമാനം നിർമ്മിച്ചിരിക്കുന്നതെന്ന് കത്തിലുണ്ട്. എച്ച്.ടി ലൈനുകൾക്ക് താഴെ താത്കാലികമോ സ്ഥിരമോ ആയ നിർമ്മാണ പ്രവർത്തനങ്ങൾ അനുവദിക്കുന്നതല്ല. രണ്ട് ട്രാൻസ്‌ഫോമറുകൾക്ക് അടുത്ത് സുരക്ഷിത അകലം പാലിക്കാതെ അപകടകരമായ രീതിയിലാണ് സ്ഥിര നിർമാണം നടത്തിയിരിക്കുന്നത്. സുരക്ഷ ഉറപ്പാക്കാൻ നടപടിയെടുത്തില്ലെങ്കിൽ നിയമനടപടി ആരംഭിക്കുമെന്നും വ്യക്തമാക്കിയാണ് നഗരസഭയ്ക്ക് കത്ത് നൽകിയിരിക്കുന്നത്. കഴിഞ്ഞദിവസം രാത്രിയിലെ നിർമ്മാണ പ്രവർത്തനങ്ങൾ സി.പി.ഐ പ്രവർത്തകർ തടഞ്ഞിരുന്നു. തുടർന്നാണ് ഇപ്പോൾ വൈദ്യുതി വകുപ്പ് സുരക്ഷാ ഭീക്ഷണിയെന്ന് കാണിച്ച നഗരസഭ അധികൃതർക്ക് കത്ത് നൽകിയിരിക്കുന്നത്.