ഉടുമ്പന്നൂർ: പഞ്ചായത്തിന് കീഴിൽ പ്രവർത്തിക്കുന്ന തട്ടക്കുഴ കുടുംബാരോഗ്യ കേന്ദ്രത്തിൽ സായാഹ്ന ഒ.പി യുടെ പ്രവർത്തനം നാളെ മുതൽ ആരംഭിക്കും. നിലവിൽ ഉച്ചയ്ക്ക് ഒന്ന് വരെയാണ് ഒ.പി പ്രവർത്തിക്കുന്നതെങ്കിലും രോഗികളുടെ തിരക്ക് മൂലം പലപ്പോഴും മൂന്ന് വരെ നീളാറുണ്ട്. ഇത് ഡോക്ടർമാർക്കും മറ്റ് ജീവനക്കാർക്കും പൊതുജനങ്ങൾക്കും ബുദ്ധിമുട്ടുണ്ടാക്കുന്ന പശ്ചാത്തലത്തിലാണ് ഒ.പി സേവനം വൈകിട്ട് അഞ്ച് വരെ നീട്ടാൻ തീരുമാനിച്ചത്. ഇതിനായി നിയമിക്കുന്ന അധിക ഡോക്ടറുടെ വേതനം പഞ്ചായത്ത് നൽകും. ഒരു നഴ്സിംഗ് അസിസ്റ്റന്റിനെ എൻ.എച്ച്.എമ്മിൽ നിന്ന് അനുവദിക്കും. പഞ്ചായത്തിന്റെ 'അവൾക്കൊപ്പം" പദ്ധതിയുടെ ഭാഗമായി നിലവിൽ കുടുംബാരോഗ്യ കേന്ദ്രത്തിലെ ലാബിൽ വനിതകളുടെ രക്ത പരിശോധന സൗജന്യമാണ്. ആശുപത്രിക്കായുള്ള പുതിയ കെട്ടിടത്തിന്റെ നിർമ്മാണം സെപ്തംബർ അവസാന വാരം ആരംഭിക്കും. സായാഹ്ന ഒ.പി സേവനത്തിന്റെ ഉദ്ഘാടനം ഒന്നിന് ഉച്ചകഴിഞ്ഞ് മൂന്നിന് പ്രസിഡന്റ് എം. ലതീഷ് നിർവ്വഹിക്കും. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ സുലൈഷ സലിം അദ്ധ്യക്ഷയാകും.