പയ്യന്നൂർ: വെള്ളൂർ ചാമക്കാവ് ഭഗവതി ക്ഷേത്രത്തോടനുബന്ധിച്ചുള്ള ചാമക്കാവിന്റെ നവീകരണ പ്രവർത്തനങ്ങൾക്കായി നഗരസഭയും കേരള സ്റ്റേറ്റ് ജൈവ വൈവിദ്ധ്യ ബോർഡും ചേർന്ന് പദ്ധതി തയ്യാറാക്കുന്നു. മലബാർ ദേവസ്വം ബോർഡിന്റെ ഉടമസ്ഥതയിലുള്ള 8.5 ഏക്കർ വിസ്തൃതിയുള്ള കാവ്, വെള്ളൂർ ഗ്രാമത്തിന്റെ ഭൂഗർഭ ജലനിരപ്പ് നിലനിർത്തുന്നതിൽ പ്രധാന പങ്കാണ് വഹിക്കുന്നത്. ജനങ്ങളുടെ ആരോഗ്യ സംരക്ഷണത്തിനാവശ്യമായ നിരവധി ഔഷധ സസ്യങ്ങളടക്കം നിരവധി മരങ്ങളും, പൂച്ചെടികളും, പക്ഷികളും, മൃഗങ്ങളും, പൂമ്പാറ്റകളും, സൂക്ഷ്മ ജീവികളും കൊണ്ട് സമ്പന്നം കൂടിയാണ് ചാമക്കാവ്. കാവിനോടനുബന്ധിച്ചുള്ള കുളം നാടൻ മത്സ്യങ്ങളാൽ സമ്പന്നമാണ്.

കാവിന്റെ ജൈവവൈവിധ്യം നിലനിർത്തിക്കൊണ്ട് പൂർവ്വ സ്ഥിതിയിലാക്കാനുള്ള പദ്ധതിയാണ് നഗരസഭയുടെ നേതൃത്വത്തിൻ നടപ്പിലാക്കുന്നത്. ജൈവ വേലി നിർമ്മാണം, ഔഷധ - വൃക്ഷ തൈകൾ വെച്ച് പിടിപ്പിക്കൽ, ബോധവൽക്കരണ ബോർഡുകൾ സ്ഥാപിക്കൽ എന്നീ പ്രവർത്തനങ്ങൾ ആദ്യഘട്ടത്തിൽ നടത്തും.

പുനരുദ്ധാരണ പ്രവൃത്തിയുടെ ഉദ്ഘാടനം നാളെ കേരള സംസ്ഥാന ജൈവ വൈവിധ്യ ബോർഡ് സെക്രട്ടറി ഡോ.വി.ബാലകൃഷ്ണൻ നിർവ്വഹിക്കും. വെള്ളൂർ സ്കൂളിൽ നടക്കുന്ന ചടങ്ങിൽ നഗരസഭ ചെയർപേഴ്സൺ കെ.വി. ലളിത അദ്ധ്യക്ഷത വഹിക്കും.

നഗരസഭയിലെ പൊതുകുളങ്ങളും, ജലാശയങ്ങളും സംരക്ഷിക്കുന്നതിനുള്ള വിവിധ പദ്ധതികൾ നടപ്പിലാക്കിയതോടൊപ്പം തുടർ പ്രവർത്തനം എന്ന നിലയിലാണ് കേരള സംസ്ഥാന ജൈവ വൈവിധ്യ ബോർഡിന്റെ സഹകരണത്തോടെ ജൈവ വൈവിധ്യത്തിന്റെ കലവറയായ വെള്ളൂർ ചാമക്കാവിന്റെ സംരക്ഷണത്തിനും പദ്ധതി ഒരുക്കിയത്.

ചെയർപേഴ്സന്റെ നേതൃത്വത്തിൽ

സ്ഥലം സന്ദർശിച്ചു

പദ്ധതി നടപ്പിലാക്കുന്നതിന്റെ മുന്നോടിയായി നഗരസഭ ചെയർപേഴ്സൺ കെ.വി. ലളിതയുടെ നേതൃത്വത്തിൽ കേരള സംസ്ഥാന ജൈവ വൈവിധ്യ ബോർഡ് ടി.എസ്.ജി. അംഗം ഡോ.രതീഷ് നാരായണൻ ചാമക്കാവ് സന്ദർശിച്ചു. നഗരസഭ വൈസ് ചെയർമാൻ പി.വി.കുഞ്ഞപ്പൻ, നഗരസസഭാംഗം ടി. ദാക്ഷയണി, സെക്രട്ടറി എം.കെ.ഗിരീഷ്, ക്ലീൻസിറ്റി മാനേജർ പി.പി. കൃഷ്ണൻ, ബി.എം.സി.കൺവീനർ ബി.വിജയൻ എന്നിവരും ഉണ്ടായിരുന്നു. നാശോന്മുഖമായികൊണ്ടിരിക്കുന്ന ആവാസ വ്യവസ്ഥകളെ പുന:സ്ഥാപിക്കുന്നതിനായി വിവിധ പദ്ധതികളാണ് നഗരസഭയുടെ നേതൃത്വത്തിൽ നടപ്പിലാക്കി

കൊണ്ടിരിക്കുന്നത്.

8.5 ഏക്കർ വിസ്തൃതിയുള്ള കാവ്