പയ്യന്നൂർ: വെള്ളൂർ ചാമക്കാവ് ഭഗവതി ക്ഷേത്രത്തോടനുബന്ധിച്ചുള്ള ചാമക്കാവിന്റെ നവീകരണ പ്രവർത്തനങ്ങൾക്കായി നഗരസഭയും സംസ്ഥാന ജൈവ വൈവിധ്യ ബോർഡും ചേർന്ന് തയ്യാറാക്കിയ പദ്ധതിയുടെ പ്രവൃത്തി ഉദ്ഘാടനം ജൈവ വൈവിധ്യ ബോർഡ് സെക്രട്ടറി ഡോ: വി. ബാലകൃഷ്ണൻ നിർവ്വഹിച്ചു. വെള്ളൂർ ഗവ. ഹയർസെക്കൻ‌ഡറി സ്കൂളിൽ നടന്ന ചടങ്ങിൽ നഗരസഭ ചെയർപേഴ്സൺ കെ.വി.ലളിത അദ്ധ്യക്ഷത വഹിച്ചു. നഗരസഭ ബി.എം.സി.കൺവീനർ ബി.വിജയൻ പദ്ധതി വിശദീകരിച്ചു.

വൈസ് ചെയർമാൻ പി.വി.കുഞ്ഞപ്പൻ, കൗൺസിലർമാരായ ടി.ദാക്ഷായണി, കെ.കെ.ഫൽഗുനൻ, ഇ.ഭാസ്ക്കരൻ, ഇ.കരുണാകരൻ, ചാമക്കാവ് ട്രസ്റ്റി ബോർഡ് ചെയർമാൻ പി.കെ.രമേശൻ, കൃഷ്ണവർമ്മരാജ, നഗരസഭ ക്ലീൻ സിറ്റി മാനേജർ പി.പി.കൃഷ്ണൻ, ഹെൽത്ത് ഇൻസ്പെക്ടർ എം.പി.രാജേഷ് കുമാർ, സ്കൂൾ പ്രിൻസിപ്പൽ കെ.ജയചന്ദ്രൻ, ഹെഡ് മിസ്ട്രസ് സി.സരള സംസാരിച്ചു.

8.5 ഏക്കർ വിസ്തൃതിയുള്ള കാവിന്റെ നിലവിലുള്ള ജൈവ വൈവിധ്യം നിലനിർത്തി പൈതൃകം വിളിച്ചോതുന്ന തരത്തിലുള്ള പദ്ധതികളാണ് നടപ്പിലാക്കുന്നത്. ജൈവ വേലി നിർമ്മാണം, ഔഷധ - വൃക്ഷ തൈകൾ വെച്ച് പിടിപ്പിക്കൽ, ബോധവൽക്കരണ ബോർഡുകൾ സ്ഥാപിക്കൽ തുടങ്ങിയ പ്രവർത്തനങ്ങളാണ് ആദ്യഘട്ടത്തിൽ നടപ്പിലാക്കുന്നത്. നാശോന്മുഖമായികൊണ്ടിരിക്കുന്ന ആവാസ വ്യവസ്ഥകളെ പുന:സ്ഥാപിക്കുന്നതിനായി നഗരസഭയിലെ പൊതു കുളങ്ങളും, ജലാശയങ്ങളും സംരക്ഷിക്കുന്നതിനുള്ള വിവിധ പദ്ധതികളുടെ തുടർപ്രവർത്തനം എന്ന നിലയിലാണ് കേരള സംസ്ഥാന ജൈവ വൈവിധ്യ ബോർഡിന്റെ സഹകരണത്തോടെ 5 ലക്ഷം രൂപ ചെലവിൽ ജൈവ വൈവിധ്യത്തിന്റെ കലവറയായ വെള്ളൂർ ചാമക്കാവിന്റെ സംരക്ഷണത്തിനും പദ്ധതി തയ്യാറാക്കിയതെന്ന് ചെയർപേഴ്സൺ കെ.വി. ലളിത പറഞ്ഞു.