പാനൂർ : ഭൂഗർഭ ജലം താണുകൊണ്ടിരിക്കുന്ന അപകടകരമായ അവസ്ഥയിലേക്ക് പാനൂർ ബ്ലോക്ക് പഞ്ചായത്ത്. സെമി ക്രിട്ടിക്കലിൽ നിന്നും അത്യന്തം അപകടകരമായ ക്രിട്ടിക്കൽ സ്ഥിതിയിലേക്ക് നടന്നടുക്കുകയാണ്. ഈ അവസ്ഥയിൽ നിന്നും കരകയറാൻ കർശന നടപടികൾ വേണമെന്നും ആവശ്യമുയർന്നു. ഭൂഗർഭ ജല വകുപ്പിന്റെ ഏറ്റവും ഒടുവിലത്തെ റിപ്പോർട്ട് പ്രകാരം സെമി ക്രിട്ടിക്കൽ ഘട്ടത്തിലാണ് പാനൂർ ബ്ലോക്കിന് കീഴിലെ പഞ്ചായത്തുകൾ. ഇത് ഏറെ ഗൗരവത്തോടെയും, അത്യന്തം പ്രാധാന്യത്തോടെയും ചർച്ച ചെയ്യേണ്ട വിഷയമാണ്.

ഇത് അതീവ ഗൗരവത്തോടെ കാണേണ്ടതാണെന്നു ഹരിത കേരളം നവകേരളം മിഷൻ കണ്ണുർ ജില്ലാ കോർഡിനേറ്റർ ഇ.കെ സോമശേഖരൻ പറഞ്ഞു. ക്രിട്ടിക്കൽ ഘട്ടത്തിലേക്ക് കടന്നാൽ കാർഷിക, നിർമ്മാണ, മറ്റ് അനുബന്ധ പ്രവൃത്തികൾക്ക് തടസ്സമാകും. ഭൂഗർഭ ജലനിരപ്പ് ഉയർത്തുന്നതിനുവേണ്ടിയുള്ള കിണർ റീചാർജ്ജ് പോലുള്ള പദ്ധതികൾ നിർബന്ധമാക്കണമെന്ന് ഹൈഡ്രോളജി വകുപ്പ് ഡെപ്യൂട്ടി ഡയറക്ടർ സിന്ധു, ഭൂഗർഭ ജല വകുപ്പ് ജൂനിയർ ഹൈഡ്രേളജിസ്റ്റ് ജസീറ എന്നിവർ പറഞ്ഞു. യോഗം ബ്ലോക്ക് പ്രസിഡന്റ് എ. ശൈലജ ഉദ്ഘാടനം ചെയ്തു. പന്ന്യന്നൂർ ഗ്രാമപഞ്ചായത്ത് വൈസ് പ്രസിഡന്റ് കെ.പി രമ അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് സെക്രട്ടറി ടി.ഡി തോമസ് സ്വാഗതം പറഞ്ഞു.