തലശേരി: മുഴപ്പിലങ്ങാട് -മാഹി ബൈപാസിൽ നിയന്ത്രണംവിട്ട ലോറിയിടിച്ച് കാർ തകർന്നു. തലശേരി ചോനാടം സ്വദേശി ശിവ പാലയിൽ ആകർഷിന്റെ ബെലാനോ കാറാണ് തകർന്നത്. വെള്ളിയാഴ്ച പുലർച്ചെ 1.30 ഓടെയാണ് അപകടം. കണ്ണൂരിൽ നിന്നും വന്ന കാർ പാസെടുക്കാൻ ടോൾ ബൂത്തിലെ പാർക്കിംഗ് സ്ഥലത്ത് നിർത്തിയതായിരുന്നു.
ഇതിനിടെ കാറിൽ നിന്നിറങ്ങി ആകർഷ് ബൂത്തിനകത്തേക്ക് കയറിയോടെയാണ് നിറയെ ലോഡുമായെത്തിയ തമിഴ്നാട് രജിസ്‌ട്രേഷനിലുള്ള നാഷണൽ പെർമിറ്റ് ലോറി പിറകിലിടിച്ചത്. ഇടിയുടെ ആഘാതത്തിൽ ബെലാനോ കാർ പൂർണമായി തകർന്നു. തലനാരിഴയ്ക്കാണ് അപകടത്തിൽ നിന്നു രക്ഷപ്പെട്ടതെന്ന് പ്രവാസിയായ ആകർഷ് പറഞ്ഞു. ലോറി ഓടിച്ചയാൾ ഉറങ്ങിപ്പോയതാണ് അപകടത്തിന് കാരണമെന്നാണ് സംശയിക്കുന്നത്.