കൊയിലാണ്ടി: സംസ്ഥാനത്ത് അടിക്കടി നിർമ്മാണത്തിലിരിക്കുന്ന പാലങ്ങൾ തകരുന്ന സംഭവത്തെക്കുറിച്ച് ഉന്നത തല അന്വേഷണം നടത്തണമെന്ന് കെ.പി.സി.സി അദ്ധ്യക്ഷൻ സണ്ണി ജോസഫ് എം.എൽ.എ പറഞ്ഞു. നിർമ്മാണത്തിലിരിക്കുന്ന തോരായി കടവ് പാലം തകർന്ന സ്ഥലത്ത് സന്ദർശനം നടത്തി സംസാരിക്കുകയായിരുന്നു അദ്ദേഹം. രണ്ടാഴ്ച മുമ്പാണ് ആലപ്പുഴയിൽ നിർമ്മാണത്തിലിരിക്കുന്ന പാലം തകർന്നു രണ്ട് തൊഴിലാളികൾക്ക് ജീവൻ നഷ്ട്ടപ്പെട്ടത്. പിന്നീട് തോരായി കടവിലും പാലം തകർന്നു. പൊതുമരാമത്ത് വകുപ്പ് നിർമ്മാണ പ്രവർത്തിയിൽ അനാസ്ഥയും ക്രമക്കേടും കാണിക്കുന്നതിന്റെ പ്രത്യക്ഷ ഉദാഹരണങ്ങളാണ് ഈ സംഭവങ്ങൾ. മൂന്ന് വർഷം മുമ്പ് മുക്കം കൂളിമാട് പാലം തകർന്നതിന്നെ കുറിച്ച് അന്വേഷണം നടത്തിയത് അല്ലാതെ നടപടികളൊന്നും ഉണ്ടായിട്ടില്ല. സംസ്ഥാന സർക്കാരിനും പൊതുമരാമത്ത് വകുപ്പ് മന്ത്രി മുഹമ്മദ് റിയാസിനും ഇക്കാര്യത്തിൽ ഒഴിഞ്ഞു മാറാൻ പറ്റില്ലെന്ന് സണ്ണി ജോസഫ് പറഞ്ഞു. പണി പുനരാരംഭിക്കുവാനും നടപടി വേണമെന്ന് അദ്ദേഹം ആവശ്യപ്പെട്ടു. ഷാഫി പറമ്പിൽ എം.പി, ഡി.സി.സി പ്രസിഡന്റ് കെ. പ്രവീൺകുമാർ, ഡി.സി.സി ജനറൽ സെക്രട്ടറി രാജേഷ് കീഴരിയൂർ, കൊയിലാണ്ടി ബ്ലോക്ക് പ്രസിഡൻ്റ്മുരളി തോറോത്ത് എന്നിവരും ഒപ്പമുണ്ടായിരുന്നു.