മാനന്തവാടി: തൃശ്ശിലേരിയിൽ വരാൻ പോകുന്ന റൂസ ഗവ. മോഡൽ ഡിഗ്രി കോളേജ് താത്ക്കാലിക അടിസ്ഥാനത്തിൽ മാനന്തവാടി ഗവ. കോളേജിൽ ഈ അക്കാദമിക വർഷം തന്നെ തുടങ്ങിയത് സർക്കാരിന്റെ ഇച്ഛാശക്തിയെന്ന് ഉന്നതവിദ്യാഭ്യാസ വകുപ്പ് മന്ത്രി ആർ. ബിന്ദു. റൂസ ഗവ. മോഡൽ ഡിഗ്രി കോളേജിന്റെ അധ്യയന പ്രവർത്തനങ്ങളുടെയും മാനന്തവാടി ഗവ. കോളജിലെ ഇംഗ്ലീഷ്, കൊമേഴ്സ്, ഡെവലപ്പ്‌മെന്റ് ഇക്കണോമിക്സ് വകുപ്പുകളിൽ ആരംഭിക്കുന്ന ഗവേഷണ കേന്ദ്രങ്ങളുടെയും ഉദ്ഘാടനം മാനന്തവാടി ഗവ. കോളേജിൽ നിർവഹിക്കുകയായിരുന്നു മന്ത്രി.

മോഡൽ കോളജ് കെട്ടിട നിർമാണ തുകയുടെ 60 ശതമാനം റൂസ പദ്ധതി പ്രകാരം കേന്ദ്ര സർക്കാർ അനുവദിക്കുമ്പോൾ കോളേജിന്റെ ഭാവി വികസനത്തിനും അദ്ധ്യാപക അനദ്ധ്യാപക ജീവനക്കാരുടെ ശമ്പളം ഉൾപ്പെടെ നടത്തിപ്പിന്റെ എല്ലാ ചെലവും വഹിക്കുന്നത് സംസ്ഥാന സർക്കാരാണെന്ന് മന്ത്രി വ്യക്തമാക്കി. 2019 ൽ തവിഞ്ഞാൽ ഗ്രാമപഞ്ചായത്തിൽ കോളേജ് കെട്ടിടത്തിന്റെ തറക്കല്ലിടൽ പ്രധാനമന്ത്രി ഓൺലൈൻ വഴി നിർവഹിച്ചെങ്കിലും ഭൂമി സംബന്ധിച്ച് കേസ് വന്നതിനാൽ കെട്ടിടം പണി തുടങ്ങാനായില്ല. തുടർന്ന് തിരുനെല്ലി ഗ്രാമപഞ്ചായത്തിലെ തൃശ്ശിലേരിയിൽ പൊതുവിദ്യാഭ്യാസ വകുപ്പ് വിട്ടുതന്ന 5 ഏക്കർ ഭൂമിയിലാണ് കോളേജ് സ്ഥാപിക്കാൻ തീരുമാനിച്ചത്. കോളേജിൽ 7 സ്ഥിരം അദ്ധ്യാപകരുടേത് ഉൾപ്പെടെ പുതിയ തസ്തികകൾ അനുവദിച്ചെന്ന് പറഞ്ഞ മന്ത്രി കോളേജ് കെട്ടിടത്തിന്റെ രൂപരേഖ എച്ച്.എം.എൽ ലൈഫ്‌കെയർ തയാറാക്കിയതായി അറിയിച്ചു. 102 വിദ്യാർത്ഥികൾ കോളേജിൽ ഇതിനകം പ്രവേശനം നേടിക്കഴിഞ്ഞു. പട്ടികജാതി പട്ടികവർഗ പിന്നാക്ക ക്ഷേമ വകുപ്പ് മന്ത്രി ഒ.ആർ കേളു അദ്ധ്യക്ഷനായി. മോഡൽ ഡിഗ്രി കോളേജ് സ്‌പെഷ്യൽ ഓഫീസർ പി. സുധീർ കുമാർ റിപ്പോർട്ട് അവതരിപ്പിച്ചു. മാനന്തവാടി ബ്ലോക്ക് പഞ്ചായത്ത് പ്രസിഡന്റ് ജസ്റ്റിൻ ബേബി, തിരുനെല്ലി ഗ്രാമപഞ്ചായത്ത് പ്രസിഡന്റ് പി.വി ബാലകൃഷ്ണൻ, വെള്ളമുണ്ട ഗ്രാമപഞ്ചായത്ത് പ്രസിഡന്റ് സുധി രാധാകൃഷ്ണൻ, എടവക ഗ്രാമപഞ്ചായത്ത് പ്രസിഡന്റ് ബ്രാൻ അഹമ്മദ് കുട്ടി, ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി, ജില്ലാ പഞ്ചായത്ത് മെമ്പർ കെ. വിജയൻ, വാർഡ് മെമ്പർ ലിസി ജോണി, കണ്ണൂർ സർവകലാശാല സിൻഡിക്കേറ്റ് അംഗം കെ.ടി ചന്ദ്രമോഹൻ, പി.ടി.എ വൈസ് പ്രസിഡന്റ് കെ.ടി വിനു, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു. കോളജ് വിദ്യാഭ്യാസ വകുപ്പ് അഡീഷണൽ ഡയറക്ടർ ഡോ. ജെ. സുനിൽ ജോൺ സ്വാഗതവും മാനന്തവാടി ഗവ. കോളേജ് പ്രിൻസിപ്പൽ ഡോ. കെ. അബ്ദുൽ സലാം നന്ദിയും പറഞ്ഞു.