പാലാ: നഗരസഭാപരിധിയിൽ അടിക്കടി ഉണ്ടാകുന്ന വൈദ്യുതിതടസത്തിന് ശാശ്വത പരിഹാരമുണ്ടാക്കാൻ മാണി സി.കാപ്പൻ എം.എൽ.എ നടത്തിയ ഇടപെടൽ ഫലംകണ്ടു. നഗരസഭ പരിധിയിൽ കേടായ കേബിളുകൾക്ക് പകരം പുതിയ ഹൈടെൻഷൻ എ.ബി.സി കേബിളുകൾ സ്ഥാപിക്കാനാണ് തീരുമാനം. ആവശ്യമായ കേബിളുകൾ എത്തിയിട്ടുണ്ടെന്നും ശക്തമായ മഴ മാറിയാൽ ഉടനെ പണി ആരംഭിക്കുമെന്നും മാണി സി.കാപ്പൻ പറഞ്ഞു.

നഗരസഭാ പരിധിയിൽ നിരന്തരമായി വൈദ്യുതി തടസമുണ്ടാകുന്നത് ജനങ്ങൾക്ക് ദുരിതവും വ്യാപാര സ്ഥാപനങ്ങൾക്ക് വലിയ നഷ്ടവും ഉണ്ടാക്കിയിരുന്നു.വർഷങ്ങൾക്ക് മുമ്പ് എ.ബി.സി കേബിളുകൾ സ്ഥാപിച്ചതിലെ അശാസ്ത്രീയതയായിരുന്നു ഇതിന് കാരണമെന്ന് വ്യാപകമായ പരാതിയുണ്ടായിരുന്നു. ഇതേതുടർന്ന് വൈദ്യുതി മന്ത്രിയെ നേരിൽകണ്ട് എം.എൽ.എ കാര്യങ്ങൾ ബോധ്യപ്പെടുത്തിയതിന്റെ അടിസ്ഥാനത്തിലാണ് അടിയന്തര പരിഹാരത്തിനുള്ള നടപടികൾ സ്വീകരിച്ചത്.