വൈക്കം: കിഫ്ബിയുടെ 157 കോടി രൂപ ധനസഹായത്തോടെ നിർമ്മിക്കുന്ന വൈക്കം വെച്ചൂർ റോഡ് വികസനത്തിനാവശ്യമായ ഭൂമി ഏ​റ്റെടുക്കലുമായി ബന്ധപ്പെട്ട അവസാന നടപടിക്രമമായ ഭൂമി ഏ​റ്റെടുക്കൽ പുനരധിവാസ (കെ.എൽ.എൽ.ആർ.ആർ) നിയമപ്രകാരമുള്ള വിജ്ഞാപനം പ്രസിദ്ധീകരിച്ചു. ഗസ​റ്റ് നോട്ടിഫിക്കേഷൻ തീയതി മുതൽ 30 ദിവസത്തെ നോട്ടീസ് നൽകി ഭൂമി ഏ​റ്റെടുക്കുന്ന 963 ഭൂവുടമകളെയും നേരിൽ കേട്ട് ബന്ധപ്പെട്ട രേഖകൾ പരിശോധിച്ചതിനുശേഷം ഭൂമി വില കൈമാറാനാകുമെന്ന് സി.കെ ആശ എം.എൽ.എ അറിയിച്ചു. ഏ​റ്റെടുക്കുന്ന ഭൂമിയുടെ വിലയായി 85.77 കോടി രൂപ കിഫ്ബിയിൽനിന്നും കേരള റോഡ് ഫണ്ട് ബോർഡ് മുഖാന്തിരം ഭൂമി ഏ​റ്റെടുക്കൽ സ്‌പെഷ്യൽ തഹസിൽദാർക്ക് കൈമാറിയിരുന്നു. വില നൽകി ഭൂമി ഏ​റ്റെടുത്ത് സമയബന്ധിതമായി റോഡ് നിർമാണം ആരംഭിക്കാനാവുന്ന സാഹചര്യമാണ് നിലവിലുള്ളതെന്നും എം.എൽ.എ അറിയിച്ചു.