ചങ്ങനാശേരി: ചങ്ങനാശേരി സ്വദേശിയെ തടഞ്ഞുവെച്ച് ഭീഷണിപ്പെടുത്തി പണം തട്ടിയ കേസിലെ പ്രതികൾ അറസ്റ്റിൽ.ആനിക്കാട് ചെങ്ങളം നായിപ്ലാവിൽ സാജൻ (47), കൂരോപ്പട ളാക്കാട്ടൂർ ഉള്ളന്നൂർ അനൂപ് (47) എന്നിവരെയാണ് പള്ളിക്കത്തോട് പൊലീസ് അറസ്റ്റ് ചെയ്തത്. ജൂലായ് 18നാണ് കേസിനാസ്പദമായ സംഭവം. പള്ളിക്കത്തോട് സമോവർ ഗ്രാൻഡ് റസ്റ്റോറന്റിൽ വിളിച്ചുവരുത്തിയ ചങ്ങനാശേരി സ്വദേശിയായ ബിസിനസുകാരനെ വ്യാപാരസ്ഥാപനങ്ങൾ പൂട്ടിക്കുമെന്നും മറ്റും ഭീഷണിപ്പെടുത്തുകയും രണ്ടു കോടി രൂപ ആവശ്യപ്പെട്ടു. കൂടാതെ, പരാതിക്കാരന്റെ കയ്യിൽ ഉണ്ടായിരുന്ന ഒരു ലക്ഷം രൂപ തട്ടിയെടുക്കുകയും ചെയ്തു. പരാതിയെ തുടർന്ന്, അന്വേഷണം നടത്തി എസ്.ഐ പി.എൻ ഷാജിയുടെ നേതൃത്വത്തിലുള്ള സംഘം ഇവരെ പിടികൂടി. കോടതിയിൽ ഹാജരാക്കിയ ഇവരെ റിമാൻഡ് ചെയ്തു.