ഒരു മാളിലോ തീയേറ്ററിലോ ആശുപത്രിയലോ ഉള്ള ടോയ്ലറ്റിലേക്ക് നടന്നുകയറിയാൽ എല്ലാവരും കൗതുകത്തോടെ നോക്കുന്ന ഒന്നുണ്ട്. ടോയ്ലറ്റ് വാതിലുകളിൽ എല്ലാത്തിനും അടിഭാഗത്തായി ഒരു വിടവ് കാണാം. വീടുകളിലും ഹോട്ടൽ മുറികളിലും കാണപ്പെടുന്ന തറ മുതൽ സീലിംഗ് വരെയുള്ള കട്ടിയുള്ള വാതിലുകളിൽ നിന്നും വ്യത്യസ്തമാണിത്. തറയിൽ നിന്ന് മുകളിലായാണ് ഈ വാതിലുകൾ സ്ഥിതി ചെയ്യുന്നത്. ഇത് എന്തുകൊണ്ടാണെന്ന് നിങ്ങൾക്ക് അറിയാമോ?

ചുരുക്കിപ്പറഞ്ഞാൽ, സുരക്ഷയും ശുചിത്വവും ചെലവ് ചുരുക്കലും മുൻനിർത്തിയാണിത്. തിരക്കേറിയ സ്ഥലങ്ങളിലാണ് ഇത്തരം ടോയ്ലറ്റുകൾ പൊതുവെ നിർമ്മിക്കാറുള്ളത്. ദിവസേന ആയിരക്കണക്കിന് പേരാണ് ഇവിടെ വന്നുപോകുന്നത്. അതുകൊണ്ട് അടിയിലുള്ള വിടവുകൾ ശുചീകരണ ജീവനക്കാർക്ക് ഓരോ ടോയ്ലറ്റും തുറക്കാതെ തന്നെ മോപ്പുകളും ക്ലീനിംഗ് ഉപകരണങ്ങളും ഉപയോഗിച്ച് വൃത്തിയാക്കാൻ സാധിക്കും. വെള്ളവും മാലിന്യവും കൂടുതൽ കാര്യക്ഷമമായി ഒഴുക്കിവിടാനും അടിച്ചുവൃത്തിയാക്കാനും ഇതുവഴി സാധിക്കും. ഇത് ആഡംബരമായി തോന്നില്ലെങ്കിലും കൂടുതൽ ശുചിത്വമുണ്ടാകുമെന്ന് ഉറപ്പാണ്.

ആരെങ്കിലും ബോധരഹിതനായി വീഴുകയോ ചെയ്യുന്ന മെഡിക്കൽ സാഹചര്യങ്ങളിൽ, ജീവനക്കാർക്കോ സമീപത്തുള്ളവർക്കോ ആ വിടവിലൂടെ പെട്ടെന്ന് തന്നെ സഹായം നൽകാനും അവരെ രക്ഷിക്കാനും സാധിക്കും. ഇനി പൂട്ട് തുറക്കാൻ പറ്റാത്ത സാഹചര്യമുണ്ടായാൽ മെലിഞ്ഞ ശരീരമുള്ളവരാണെങ്കിൽ ആ വിടവിലൂടെ ഇഴഞ്ഞ് പുറത്തേക്ക് വരാനും സാധിക്കും. മാത്രമല്ല, പൊതു ശൗചാലയങ്ങൾ, പ്രത്യേകിച്ച് സിനിമാ തിയേറ്ററുകൾ, മാളുകൾ തുടങ്ങിയ സ്ഥലങ്ങളിലെ പുകവലിക്കോ മറ്റ് പ്രവർത്തനങ്ങൾക്കോ വേണ്ടി ചിലപ്പോൾ ദുരുപയോഗം ചെയ്യപ്പെടുന്നുണ്ട്. ഈ വിടവ് വഴി സ്വകാര്യതയിലേക്ക് കടന്നുകയറാതെ ആളുകളുടെ മോശം പെരുമാറ്റം ജീവനക്കാർക്ക് നിരീക്ഷിക്കാൻ സാധിക്കും.

മുഴുനീള വാതിലുകൾ നിർമ്മിക്കാനും സ്ഥാപിക്കാനും ചെലവ് കൂടുതലാണ്. ഇതോടൊപ്പം ഈർപ്പത്താൽ സമ്പർക്കം പുലർത്തുന്നതിലൂടെ ഉണ്ടാകുന്ന കേടുപാടുകൾക്ക് സാദ്ധ്യത കൂടുതലാണ്. പൊതു ടോയ്ലറ്റുകളിൽ എല്ലായ്‌പ്പോഴും മികച്ച വായുസഞ്ചാരം ഉണ്ടാകണമെന്നില്ല. എന്നാൽ ഇത്തരം വാതിലുകൾ ആ പ്രശ്നം ഒരു പരിധിവരെ കുറയ്ക്കുന്നു.