പാലക്കാട്: സ്വാതന്ത്ര്യദിനം, ഓണം അവധിത്തിരക്ക് പരിഗണിച്ച് ബെംഗളൂരു-തിരുവനന്തപുരം റൂട്ടില്‍ അനുവദിച്ച സ്‌പെഷ്യല്‍ ട്രെയിനുകളില്‍ റിസര്‍വേഷന്‍ ആരംഭിച്ചു. നിലവില്‍ രണ്ട് എ.സി സ്‌പെഷ്യല്‍ ട്രെയിനാണ് അനുവദിച്ചിട്ടുള്ളത്.

രണ്ട് എ.സി 2-ടയര്‍, 16 എ.സി 3-ടയര്‍ കോച്ചുകളാണ് സ്‌പെഷ്യല്‍ ട്രെയിനുകളിലുണ്ടാവുക. ബെംഗളൂരുവില്‍ നിന്നുള്ള പതിവുട്രെയിനുകളില്‍ സ്വാതന്ത്ര്യദിന അവധിക്കും ഓണത്തിനുമുള്ള സര്‍വീസുകളിലെ ടിക്കറ്റുകള്‍ നേരത്തെ തന്നെ വെയ്റ്റിംഗ് ലിസ്റ്റിലായിരുന്നു. കെ.എസ്.ആര്‍.ടി.സി ബസുകളിലെ ടിക്കറ്റുകളും നേരത്തെ വിറ്റഴിഞ്ഞിരുന്നു.

എസ്.എം.വി.ടി ബെംഗളൂരു-തിരുവനന്തപുരം നോര്‍ത്ത് സ്‌പെഷ്യല്‍ എക്‌സ്പ്രസ്(06523/24) ആഗസ്റ്റ് 11 മുതല്‍ സെപ്തംബര്‍ 15 വരെ തിങ്കളാഴ്ചകളില്‍ രാത്രി 7.25ന് ബെംഗളൂരുവില്‍ നിന്ന് പുറപ്പെട്ട് പിറ്റേന്ന് ഉച്ചയ്ക്ക് 1.15ന് തിരുവനന്തപുരം നോര്‍ത്ത് സ്റ്റേഷനിലെത്തും. രാവിലെ 5.05നാണ് ട്രെയിന്‍ പാലക്കാട് എത്തുക. ആഗസ്റ്റ് 12 മുതല്‍ സെപ്തംബര്‍ 16 വരെ ചൊവ്വാഴ്ചകളില്‍ വൈകിട്ട് 3.15ന് തിരുവനന്തപുരത്തു നിന്നു പുറപ്പെടുന്ന മടക്ക ട്രെയിന്‍ രാത്രി 10.55ന് പാലക്കാടും പിറ്റേന്ന് രാവിലെ 8.30ന് ബെംഗളൂരുവിലും എത്തും.

രണ്ടാമത്തെ സ്‌പെഷ്യല്‍ ട്രെയിന്‍ ആഗസ്റ്റ് 13, 27, സെപ്തംബര്‍ മൂന്ന് തീയതികളിലാണ്. ബുധനാഴ്ചകളില്‍ രാത്രി 7.25ന് ബെംഗളൂരുവില്‍ നിന്ന് പുറപ്പെട്ട് പിറ്റേന്ന് ഉച്ചയ്ക്ക് 1.15ന് തിരുവനന്തപുരം നോര്‍ത്ത് സ്റ്റേഷനിലെത്തും. പിറ്റേന്ന് രാവിലെ 05.05ന് ട്രെയിന്‍ പാലക്കാടെത്തും. തിരുവനന്തപുരത്തു നിന്നുള്ള മടക്ക സര്‍വീസ് ആഗസ്റ്റ് 14, 28, സെപ്തംബര്‍ 4 വ്യാഴാഴ്ചകളില്‍ വൈകിട്ട് 3.15ന് പുറപ്പെട്ട് പിറ്റേന്ന് രാവിലെ 8.30ന് ബെംഗളൂരുവിലെത്തും. രാത്രി 10.55നാണ് ട്രെയിന്‍ പാലക്കാട് എത്തുന്നത്.