വാഷിംഗ്‌ടൺ: മലയാളി ദമ്പതികളെ യുഎസിലെ വീട്ടിൽ മരിച്ചനിലയിൽ കണ്ടെത്തി. കുമരകം സ്വദേശികളായ സി ജി പ്രസാദ് (76), ഭാര്യ പെണ്ണുക്കര പന്തപാത്രയിൽ ആനി പ്രസാദ് (73) എന്നിവരെയാണ് പെൻസിൽവേനിയ ഹാരിസ്ബർഗിലെ വീട്ടിൽ കഴിഞ്ഞ മാസം 27ന് മരിച്ച നിലയിൽ കണ്ടെത്തിയത്. ദമ്പതികൾ മാത്രമായിരുന്നു വീട്ടിലുണ്ടായിരുന്നത്.

യുഎസിലുളള ആനിയുടെ സഹോദരി സിസി ഇവരുമായി ദിവസവും വിശേഷങ്ങളറിയാൻ ഫോണിൽ ബന്ധപ്പെടാറുണ്ടായിരുന്നു. എന്നാൽ 27നു തുടർച്ചയായി ഫോണിൽ വിളിച്ചിട്ടും എടുക്കാതെ വന്നതിനെത്തുടർന്ന് ആനിയുടെ മക്കളെ വിവരം അറിയിക്കുകയായിരുന്നു. തുടർന്ന് പൊലീസിൽ വിവരം അറിയിച്ചു. പൊലീസെത്തി പരിശോധിച്ചപ്പോഴാണ് ഇരുവരെയും മരിച്ചനിലയിൽ കണ്ടത്. എയർകണ്ടീഷണറിലെ തകരാർ മൂലം വാതകച്ചോർച്ചയുണ്ടായി മരണം സംഭവിച്ചെന്നാണ് ലഭിക്കുന്ന വിവരം. ഇരുവരുടെയും സംസ്കാരം ഒമ്പതിന് ഫിലഡൽഫിയ സെന്റ് പീറ്റേഴ്സ് സിറിയൻ ഓർത്തഡോക്സ് കത്തീഡ്രൽ പൈൻഗ്രൂവ് സെമിത്തേരിയിൽ നടക്കും. സന്ധ്യ, കാവ്യ എന്നിവരാണ് മക്കൾ.