കൊല്ലം: തേങ്ങയുമായെത്തിയ മിനിലോറി നിയന്ത്രണം വിട്ടുമറിഞ്ഞ് ഓടിക്കൂടിയവര്‍ രക്ഷാപ്രവര്‍ത്തനത്തിന് മുന്നേ തേങ്ങയുമായി പാഞ്ഞു. ഇന്നലെ പുലര്‍ച്ചെ കൊട്ടാരക്കര പുലമണ്‍ ജംഗ്ഷനിലായിരുന്നു സംഭവം. എം.സി റോഡുവഴി വന്ന ലോറിയാണ് ട്രാഫിക് സിഗ്‌നലിന് സമീപം തെന്നി മറിഞ്ഞത്.
ലോറിയിലുണ്ടായിരുന്ന ആയിരത്തിലധികം തേങ്ങ റോഡിലേക്ക് തെറിച്ചുവീണു. രക്ഷാപ്രവര്‍ത്തനത്തിന് ഓടിയെത്തിയവര്‍ ഡ്രൈവര്‍ക്ക് പരിക്കില്ലെന്ന് അറിഞ്ഞതോടെ തേങ്ങ പെറുക്കാന്‍ തുടങ്ങി. പലരും തേങ്ങയുമായി ഓടി. കൊട്ടാരക്കര പൊലീസ് എത്തിയതോടെയാണ് ആളുകള്‍ അകന്നത്. നൂറിലധികം തേങ്ങ നഷ്ടപ്പെട്ടതായാണ് വിവരം. പിന്നീട് ക്രെയിന്‍ എത്തിച്ച് ലോറി ഉയര്‍ത്തിയശേഷം തേങ്ങ തിരികെ കയറ്റി. പൊലീസ് കേസെടുത്തിട്ടില്ല.
സംസ്ഥാനത്ത് പച്ചത്തേങ്ങയുടെ വില വര്‍ദ്ധിക്കുന്ന സാഹചര്യമാണുള്ളത്. വെളിച്ചെണ്ണയ്ക്കും വില റെക്കോഡ് ഉയരത്തിലാണ്. മാര്‍ക്കറ്റില്‍ വലിയ വില കൊടുത്ത് വാങ്ങുന്ന സാധനം റോഡില്‍ ആയിരക്കണക്കിന് നിരന്നതോടെയാണ് ആളുകള്‍ അവസരം മുതലാക്കിയത്. സംഭവത്തില്‍ പൊലീസ് കേസെടുക്കാത്തതിനാല്‍ തന്നെ സാധനവുമായി ഓടിയവര്‍ക്കും ആശങ്കയില്ല.
നാളികേര വില കൃത്യം ഒരു വര്‍ഷം മുമ്പ് കിലോയ്ക്ക് 32 ആയിരുന്നെങ്കില്‍ ഇന്നത് നൂറിന് അടുത്താണ്.
കേരളത്തിലെ നാളികേര കൃഷി ഇങ്ങനെ
നാളികേര കൃഷി - 7,65,840 ഹെക്ടര്‍
വാര്‍ഷിക ഉത്പാദനം - 5,522.71 ദശലക്ഷം
ഉത്പാദനക്ഷമത 7,211/ ഹെക്ടര്‍